Според резултатите од истражувањето што го спроведе „Фајненшл тајмс“ меѓу 48 економисти, еврозоната, блок составен од 20 земји, во новата 2024 година ќе постигне многу мал економски раст – само 0,6 отсто.
Нешто пооптимистички се прогнозите на Европската централна банка и Меѓународниот монетарен фонд – економијата на блокот ќе порасне за 0,8 отсто, односно 1,2 отсто во 2024 година.
Анкетираните експерти велат дека економијата на еврозоната нема да може да го надмине растот од 0,6 отсто и покрај тоа што платите се очекува да растат побрзо од инфлацијата – се предвидува растот на платите во зоната на единствената валута да биде само 4 отсто во 2024 година, додека потрошувачките цени во просек ќе растат за повеќе од 2,5 отсто и нешто под 2,1 отсто во 2025 година.
Две третини од испитаниците изјавиле дека економијата во еврозоната се лизга во рецесија.
ЕЦБ претходно прогнозираше раст на платите и инфлацијата следната година од 4,6 отсто и 2,7 отсто, соодветно, што ќе означи раст на реалниот приход на домаќинствата за прв пат во три години. Европската централна банка очекува потрошувачките цени да пораснат за 2,1 отсто во 2025 година.
Економистите за Фајненшл Тајмс предупредуваат дека невработеноста ќе се зголеми од рекордно ниско ниво од 6,5 отсто во еврозоната во октомври 2023 година на 6,9 отсто на крајот на следната година.
Исто така, се очекува дека високите каматни стапки, веројатните превирања на енергетскиот пазар и геополитичката нестабилност ќе доведат до подлабока рецесија, како и дека по еврозоната ќе следи период на уште послаб раст доколку Доналд Трамп победи на претседателските избори на САД, односно ако Украина загуби во конфликтот со Русија.
