Европската унија постигна договор за нови правила дизајнирани да ги распределат подеднакво трошоците и работата за сместување на мигрантите и да го ограничат бројот на пристигнувања, пишува „Reuters“.
Претставниците на Европскиот парламент и владите на земјите-членки на ЕУ постигнаа договор по разговорите во текот на ноќта за европските закони, колективно познати како Новиот пакт за миграција и азил, кои треба да стапат на сила следната година.
Законите опфаќаат проверка на илегалните мигранти кога ќе пристигнат во унијата, процедури за испитување на барањата за азил, правила за одредување која земја од ЕУ е одговорна за обработка на барањата и начините за справување со кризи.
Пристигнувањата на мигрантите во ЕУ значително се намалени од врвот од повеќе од 1 милион во 2015-та година, но постојано се зголемуваат од најниското ниво во 2020-та година на 255.000 во годината заклучно со ноември. Повеќе од половина го поминуваат Медитеранот од Африка до Италија или Малта.
Претходните обиди за споделување на одговорноста за прием на мигранти пропаднаа бидејќи главно источните земји-членки на ЕУ не беа подготвени да прифатат луѓе кои пристигнуваат во Грција, Италија и други земји.
Според новиот систем, неграничните земји ќе имаат избор помеѓу прифаќање бегалци или плаќање суми на фонд на ЕУ.
Предвидениот скрининг систем ќе се обиде да направи разлика помеѓу оние на кои им е потребна меѓународна заштита и другите на кои не им е потребна.
Луѓето чии барања за азил имаат мали шанси за успех, како што се оние од Индија, Тунис или Турција, може да бидат спречени да влезат во ЕУ и да бидат задржани на границата, како и луѓето за кои се смета дека претставуваат закана за безбедноста.
Групите за правата на бегалците рекоа дека тоа ќе создаде еден вид затворски камп на границите на ЕУ.
„Патот до овде беше долг. Но, успеавме. Европа конечно добива резултати за миграцијата“, рече Маргаритис Схинас, потпретседател на Европската комисија одговорен за миграцијата во објава на Х (Твитер).
Привремениот договор меѓу земјите-членки на ЕУ и Европскиот парламент, кој беше постигнат по два дена и две ноќи интензивни преговори, допрва треба да биде формално одобрен од двете групи. Во наредните недели треба да се разјаснат и голем број технички детали.
Германската министерка за надворешни работи Аналена Бербок го поздрави договорот, истакнувајќи дека за прв пат од земјите-членки на ЕУ ќе се бара да покажат солидарност меѓу себе во справувањето со миграциските текови, но додаде дека имало тешки компромиси.
„Германија не успеа да ги протурка своите амбиции за општо изземање на децата и семејствата од граничните процедури. Ова е уште една причина да се обрне внимание сега дека имплементацијата на новиот систем за азил ќе биде правична, организирана и солидарна“, рече таа во изјавата.
