На светските берзи цените на акциите пораснаа минатата недела, откако американската централна банка објави дека циклусот на затегнување на монетарната политика е завршен и дека следната година ќе следи намалување на каматните стапки.
На Волстрит, Dow Jones скокна за 2,9 отсто минатата недела, на рекордни 37.305 поени, додека S&P 500 зајакна 2,5 отсто, на 4.719 поени, а индексот Nasdaq за 2,8 отсто, на 14.813 поени.
На последниот состанок годинава, креаторите на политиката на ФЕД ги оставија каматните стапки непроменети во опсег од 5,25 до 5,50 отсто во средата, имајќи предвид дека инфлаторните притисоци постепено се намалуваат.
Тоа се очекуваше, но пазарот го поттикна оценката на речиси сите челници на ФЕД дека во наредната година каматите ќе бидат намалени и тоа во три наврати.
Дополнителна поддршка за пазарот даде коментарот на претседателот на ФЕД Џером Пауел на прес-конференција дека централната банка најверојатно нема повторно да ги зголеми каматните стапки.
„Инфлацијата се намали и без значително зголемување на невработеноста. Ова е добра вест“, рече Пауел и додаде: „Фед сега е многу фокусирана да не направи грешка да ги држи каматните стапки премногу високи предолго“.
По оценките и пораките на лидерот на ФЕД, пазарот сега проценува дека има 90 отсто шанси централната банка, по повеќе од година и пол затегнување на монетарната политика, да почне да ги намалува каматните стапки во мај.
„На крајот на краиштата, изгледа дека инфлацијата ќе се спушти на нормално ниво без рецесија. На тоа се надеваа инвеститорите, а сега тоа е многу веројатно“, рече Том Мартин, портфолио-менаџер во Globalt Investments.
Покрај Dow Jones, другите индекси на Волстрит пораснаа седма недела по ред и достигнаа нови максимални вредности оваа година.
Цените на акциите пораснаа и на повеќето европски берзи минатата недела, откако челниците на Европската централна банка одлучија да ги задржат каматните стапки непроменети на последната сесија од годината.
Аналитичарите проценуваат дека ЕЦБ, како и ФЕД, го завршија циклусот на зголемување на каматните стапки и дека следната година ќе следи намалување на каматните стапки.
Лондонскиот FTSE индекс зајакна за 0,3 отсто, на 7.576 поени, а париски CAC се зголеми за 0,9 отсто, на 7.596 поени. Франкфуртски DAX ослабе, пак, за 0,1 отсто, на 16.751 поен.
