14 јуни, 2024
ПочетнаАВТОБИЗИ „Volvo“ претстави електричен миниван (ФОТО/ВИДЕО)

И „Volvo“ претстави електричен миниван (ФОТО/ВИДЕО)

„Volvo“ го најави новиот „EM90“ како духовен наследник на моделот „Duetta“ од 1953-та година, но и како мултифункционално возило.

Сепак, во суштина „EM90“ е „Volvo“ само во поглед на дизајнот. Сè друго практично доаѓа од Кина, во форма на моделот „009“ на кинескиот бренд „Zeekr“, кој исто како и „Volvo“ е во сопственост на „Geely“.

Факт е дека „EM90“ е естетски далеку поуспешен од неговиот кинески близнак. Пред сè, се карактеризира со помирен стил со добро интегрирани детали од шведската школа за дизајн.

На предната страна има препознатливи светла и маска, од страните добро поставени алуминиумски тркала со дијаметар до 20 инчи, а на задната страна намалени линии.

Веќе надворешниот изглед јасно покажува дека се работи за патен крстосувач, чии основни услови се удобноста во возењето и атмосферата во дневната соба.

Во кабината се влегува преку огромни лизгачки врати од секоја страна на возилото, а внатре има шест фотелји во три реда. Секоја од нив нуди исклучителни можности за прилагодување на положбата во сите правци, вентилирани површини и првокласна удобност.

Навистина, екранот што се спушта од покривот е, со 15,6 инчи, половина од дијагоналата на дисплејот од „седмицата“ на „BMW“, но тој е сосема доволен за да обезбеди забава при патувањето.

Екранот на мултимедијалниот систем е малку помал (15,4″), а кокпитот е целосно дигитализиран.

„Volvo EM90“ лесно може да стане сала за состаноци, канцеларија или дури и спална соба. Амбиенталното осветлување е корисно во ова, но исто така е и совршениот аудио систем со 21 звучник „Bowers & Wilkins“.

Што се однесува до погонот, електричен мотор од 200 kW/272 ks се наоѓа позади и ги придвижува задните тркала, така што овој автомобил долг 5,2 метри може да достигне 100 km/h за 8,3 секунди. Максималната брзина е електронски ограничена на 180 km/h.

Од друга страна, поставена е огромна батерија со капацитет од 116 kWh, па покрај големата маса и неблагодарната форма на каросеријата, кога е во прашање аеродинамиката, автономијата е одлична.

Од „Volvo“ истакнуваат дека досегот е над 738 километри според кинескиот стандард „CLTC“, а полнењето од 10 до 80 отсто од капацитетот на батеријата трае само 30 минути.

Во иднина може да се очекуваат помоќни изведби, со два електромотори, за попребирливи корисници.

Во моментов, „EM90“ се нуди исклучиво во Кина, по цена од нешто повеќе од 818.000 јуани или нешто под 105.000 евра.

НАЈНОВИ ВЕСТИ

ХОРОСКОП