Израел би можел да управува со Газа на „неодредено“ време по завршувањето на војната, предложи премиерот Бенјамин Нетанјаху во интервју за американската АБЦ њуз.
Истакнувајќи дека американскиот претседател Џо Бајден претходно изјави дека ќе биде „грешка“ Израел да ја окупира Газа, новинарот Дејвид Муир го праша Нетанјаху кој треба да управува со територијата кога ќе престанат борбите. Премиерот сугерираше дека Израел ќе игра улога на „неодредено време“.
„Мислам дека Израел ќе ја има целокупната одговорност за безбедноста на неодредено време, бидејќи видовме што се случува кога ја немаме. Кога ја немаме таа безбедносна одговорност, она што го имаме е ерупција на теророт на Хамас од размери што не можеме да ги замислиме“, рече Нетанјаху.
Минатиот месец, израелскиот министер за одбрана Јоав Галант рече дека една од клучните цели на израелската воена кампања е да се стави крај на „одговорноста на Израел за животот во Појасот Газа“ и да се воспостави „нова безбедносна реалност за граѓаните на Израел“. САД, исто така, сугерираа дека палестинската управа, која управува со Западниот Брег, би можела да ја преземе контролата во Газа, додека други сугерираа дека конзорциумот од арапски држави би можел да ја преземе одговорноста.
Запрашан за коментарите на Нетанјаху, портпаролот на Советот за национална безбедност на САД, Џон Кирби рече: „Она што го поддржуваме е дека Хамас повеќе не може да ја контролира Газа. Имаме дискусии со нашите израелски колеги за тоа како треба да изгледа владеењето во Газа по конфликтот“.
