Кинескиот претседател Кси Џинпинг изјави во средата дека Кина е подготвена да соработува со Соединетите Американски Држави, без оглед на меѓусебните разлики, за двете земји да можат заедно да одговорат на глобалните предизвици, објавија кинеските државни медиуми.
Во писмото доставено до учесниците на годишната вечера на Националниот комитет за односи меѓу САД и Кина со седиште во Њујорк, Кси напиша дека клучните односи во светот зависат од тоа дали двете земји ќе можат да воспостават соодветни меѓусебни односи, пренесува Ројтерс.
Повикот на кинескиот претседател за постабилни билатерални врски, за кои рече дека треба да се градат врз принципите на меѓусебно почитување и мирен соживот, доаѓа пред клучната посета на кинескиот министер за надворешни работи Ванг Ји на Вашингтон подоцна оваа недела.
Средба на Кси и Бајден
Американскиот претседател Џо Бајден и Кси се очекува да се сретнат во Сан Франциско на ноемврискиот самит на АПЕК.
Американскиот државен секретар Ентони Блинкен и советникот за национална безбедност на Белата куќа Џејк Саливан ќе се сретнат со Ванг во петок во Вашингтон, објави портпаролката на Белата куќа Карин Жан-Пјер.
Според неа, на средбата ќе се разговара за отворените прашања меѓу двете земји.
