Терористичката група Хезболах најчесто му се заканува на Израел дека ќе војува и дека ќе избие хаос на целиот Блиски Исток, а тензиите долж границата на Израел со Либан, кои секојдневно растат, одат во прилог на тоа. Во вторникот ракета од Либан падна во северен Израел. Доколку лидерите на Хезболах решат да ја интензивираат неконтролираната ескалација, може да дојде до крвав и тежок конфликт на два фронта за Израел, што потоа веројатно би ги довело земјите како Сирија, Иран и Соединетите Американски Држави во конфликт. Што е либанската милитантна организација Хезболах?
По размената на оган со Израел, Хезболах испрати закана до целиот свет.
Терористичката група предупреди дека е „илјада пати посилна“ од претходно, додека САД го предупредија Иран, кој ги поддржува Хезболах и Хамас, да не се меша во кризата.
Америка распореди два носачи на авиони за да спречи какви било државни или недржавни актери да го ескалираат конфликтот.
За разлика од Хамас и Исламски џихад, Хезболах не е сместен во Палестина, туку во Либан.
Што е Хезболах?
Бидејќи е директно поврзана со Иран, оваа група има длабоки врски со други групи поврзани со Иран како Хамас и Исламски џихад. Откако нападот се случи во саботата наутро, на 7 октомври, Хезболах објави дека е во „директен контакт со раководството на палестинскиот отпор“.
Хезболах има различен статус со различни сили – некои земји го прогласија за терористичка организација во целост, некои само за воено крило, а има и земји како Русија и Кина кои одржуваат контакт со него. ЕУ го прогласи военото крило на Хезболах за терористичка организација, додека Германија тоа го направи целосно во април оваа година. Велика Британија тоа го направи минатата година, а малку порано, во 2016 година, го направи и Арапската лига.
Групата е шиитска либанска проиранска паравоена организација која е создадена во 1982 година како одговор на влегувањето на Израел во јужен Либан. По 18 години, военото крило на Хезболах (Исламски отпор на Либан) го принуди Израел да се повлече во 2000 година, по многуте загуби што им беа нанесени на Израелците.
Движењето прерасна во организација која денес има широк спектар на активности, вклучувајќи радио, телевизија, весници, училишта, болници, социјални институции, а некои членови се дел од либанската влада.
Хезболах е обвинет за големи и крвави насилства во Либан, а експертите за тероризам го сметаат за пионер на самоубиствени напади.
Односите меѓу Хезболах и палестинската фракција Хамас не биле секогаш добри. Хамас е огранок на сунитското движење Муслиманско братство, додека идеолошкиот извор на Хезболах е иранската револуција.
Двете групи се скараа околу Сирија за време на граѓанската војна, кога Хамас одби да ја поддржи владата на Башар ал Асад. Но, претставниците на двете групи редовно се консултираат. Сите се посветени на уништување на Израел и се противат на какво било нормализирање на врските меѓу арапските или муслиманските држави.
Колку е моќен Хезболах?
Главниот финансиер на Хезболах е Иран, а одредена помош доаѓа и од Сирија. Воената тактика главно се заснова на ракетирање на Израел. Нападите ја исклучуваат употребата на бомбаши самоубијци, а исто така, барем во принцип, цивилите не се напаѓаат.
„Хезболах има 20.000 борци, од кои многу се високо обучени и добро вооружени. Сепак, како што пишува „Гардијан“, армијата би можела брзо да се зголеми со повикување на уште 30.000 резервисти, иако тие се помалку добро обучени членови“, вели аналитичарот специјализиран за Хезболах – Навед Ахмед.
Многу од командантите на Хезболах стекнаа искуство во битките во Сирија, каде што организацијата беше формирана за да го зајакне режимот на претседателот Башар ал Асад.
Експертите велат дека упориштето на Хезболах во јужен Либан е зајакнато со систем од бункери, тунели и подземни магацини.
Што е најважно, Хезболах има огромна залиха на ракети со долг дострел, кои би можеле да погодат цели речиси насекаде во Израел, уништувајќи ја основната инфраструктура, како и населените области.
