Биткоинот е веќе застарена работа. Ова го кажуваат за „Reuters“ некои од крипто-инвеститорите кои се обложуваат на блокчејн технологијата како алатка за вдишување нов живот во традиционалните средства.
Бидејќи цените на криптовалутите се менуваат во очекување на нивното следно опаѓање или скок, пазарот за „токенизација“ – издавање на дигитални токени базирани на блокчејн кои претставуваат различни средства – од обврзници до акции до недвижен имот – можеби конечно ќе достигне критични моменти или нивоа на прифаќање.
Големите финансиски компании како што се „London Stock Exchange Group“, „WisdomTree“ и „Mirae Asset Securities“ или инвестираа во платформи за тргување за слични токени во изминатата година или се во преговори за нивно развивање. Други, како што се „Franklin Templeton“, „UBS Asset Management“ и „ABN Amro“ веќе лансираа токенизирани верзии на средства како што се фондовите на пазарот на пари и зелените обврзници.
Повеќе од 1/3 од американските институционални инвеститори и скоро 2/3 од инвеститорите со висока нето вредност планираат да инвестираат во токенизирани средства оваа или следната година, според две истражувања на повеќе од 300 учесници, спроведени од „EY-Parthenon“ во мај.
Според Колин Батлер, глобален шеф на институционален капитал во блокчејн компанијата „Polygon Labs“, потенцијалот за заштеда на трансакциските трошоци ги прави големите инвестициски играчи заинтересирани за нив.
„Во моментов, борбата за пазарен удел и профит е како борба со ножеви, така што овие идеи за намалување на трошоците се многу силни“, вели тој, додавајќи дека институциите поминале години истражувајќи ја токенизацијата и сега се чувствуваат поудобно да започнат слични проекти.
Застапниците на идејата велат дека токенизацијата нуди традиционално финансии потранспарентно тргување, зголемена ликвидност, плус намалени трошоци и време за порамнување, преку автоматизирање на процесите преку паметни договори – пактови базирани на блокчејн кои се решаваат автоматски.
Од друга страна, критичарите укажуваат на големите празнини во трговската инфраструктура, недостатокот на кохерентна глобална регулатива и сè уште ограниченото влијание на концептот меѓу инвеститорите.
Но, засега, вистинското издавање и вредноста на токенизираните традиционални средства остануваат мали.
Мрежен ефект
Пазарната капитализација на токенизираните јавни хартии од вредност е 345 милиони долари, според податоците на „Dune Analytics“, што е мал дел од поширокиот пазар на криптовалути, кој достигнува 1 трилион долари. Овие токени забележаа раст од 2,3% во текот на изминатите 30 дена, заостанување од растот на Биткоин во истиот период за околу 10%.
Во заедничкиот извештај на „Northern Trust“ и „HSBC“ од почетокот на оваа година се наведува дека до 2030-та година, 5 до 10% од сите средства ќе бидат дигитални.
И покрај тоа што идејата за токенизација постои речиси онолку долго колку што траеше криптовалутата број 1, новиот пазар не ги оправда сите очекувања. Но, сега некои учесници забележуваат значителен напредок.
„Мислам дека овојпат е поинаку, во голем дел затоа што сега гледаме учество на високо ниво од големите компании“, рече Морган Крупецки, шеф на институции и пазари на капитал во „Ava Labs“.
Но, пречките остануваат, а учесниците на пазарот, меѓу другото, ја наведуваат потребата од поголеми трговски базени. Сепак, некои се оптимисти.
„Во иднина, луѓето се надеваат на подобар мрежен ефект каде што повеќе компании ќе ги усвојат истите платформи, така што средствата ќе станат повеќе за тргување“, рече Даг Швенк, извршен директор на „Digital Asset Research“.
