Глобалната продажба на Тојота се зголеми за девет отсто во август во однос на претходната година на рекордни 923.180 возила, благодарение на подобрените услови за снабдување и зголемената побарувачка.
И светското производство се зголеми за четири отсто на рекордни 924.509 возила, вклучувајќи ги и подружниците Даихатсу Мотор и Хино Моторс, објави јапонскиот производител во четвртокот, пренесува Блумберг.
Продажбата на автомобили Тојота и Лексус порасна за повеќе од три отсто во Европа, главно во Италија, Шпанија и Англија. Но, продажбата падна за четири отсто во Азија, вклучително и пад од шест отсто во Кина, каде што компанијата и други производители на автомобили како Фолксваген се борат да се натпреваруваат со кинеските производители на електрични возила (EV) како што е BYD.
Продажбата на Toyota во Јапонија се зголеми за 45 отсто во однос на истиот период минатата година во август и 63 отсто во Јужна Кореја.
Најпродаваниот светски производител на автомобили им кажа на добавувачите дека планира да произведе 150.000 електрични возила оваа година, 190.000 во 2024 година и 600.000 во 2025 година, според извештајот на Никеи минатата недела.
Тојота продаде 11.880 електрични возила со батерии во август, со што вкупниот број оваа година достигна 65.467. Тоа е двојно повеќе од 24.000 продадени во 2022 година, но сепак е многу далеку од 1,5 милиони кои ги вети генералниот директор Коџи Сато, дека ќе продава секоја година до 2026 година.
