Соединетите Држави силно ги осудуваат координираните насилни напади врз косовската полиција во близина на манастирот Бањска и изразуваат длабоко сочувство до семејството на наредникот на косовската полиција кој беше убиен за време на службената должност, изјави во понеделникот американскиот државен секретар Ентони Блинкен.
Во изјавата на Блинкен објавена од Стејт департментот се наведува дека сторителите на злосторството мора да одговараат во транспарентен истражен процес, објави Гласот на Америка.
„Ги повикуваме владите на Косово и Србија да се воздржат од каква било акција или реторика што може дополнително да ги поттикне тензиите и веднаш да работат во координација со меѓународните партнери за деескалација на ситуацијата, обезбедување безбедност и владеење на правото и враќање на дијалогот под покровителство на ЕУ“, рече Блинкен.
Тој рече дека косовската полиција има „целосна одговорност за спроведување на владеењето на правото во Република Косово“ и дека „САД ја признаваат и почитуваат улогата на косовската полиција како прв одговор во вонредни и кризни ситуации“.
„САД ја ценат блиската координација на косовската полиција со Мисијата на ЕУ за владеење на правото на Косово (ЕУЛЕКС) и со силите на НАТО во Косово, особено во обезбедувањето на безбедноста на цивилите на теренот“, рече Блинкен, велејќи дека САД ќе продолжи да ја следи ситуацијата и да се координира со сите вклучени.
Се огласи и американската амбасада во Србија.
Неодамнешните насилни напади врз косовската полиција во близина на манастирот Бањска се неприфатливи. Ги повикуваме владите на Косово и Србија да се воздржат од потези кои дополнително ќе ги зголемат тензиите и веднаш да се вратат на дијалогот под покровителство на ЕУ, стои во соопштението на Амбасадата на платформата Х (поранешен Твитер).
