Непосредно пред лансирањето на пазарот, новата „Panamera“ минува низ последните тестови за подесување. Во и околу Барселона, инженерите ги проверуваат последните детали и доработката на новата генерација на моделот.
Во овој момент, спортскиот седан веќе го заврши најголемиот дел од тест-процедурата.
Спортскиот автомобил со четири врати го докажа својот квалитет на четири континенти. Тестирањето е спроведено во САД, на пример, за проверка на перформансите на погонот на големи надморски височини со ниски нивоа на кислород или за проверка на перформансите на системите за ладење на моторот и климатизација при екстремна топлина.
Во Скандинавија, „Panamera“ возеше под екстремно студени услови, во Јужна Африка ги надмина предизвикувачките услови на патот, а во Азија, високата влажност и часовите во сообраќајот во мегаградовите претставуваат многу посебни предизвици за комплетниот пакет.
„Ние интензивно го тестираме секое ново возило за да ги исполниме нашите барања и, пред сè, барањата на нашите клиенти ширум светот. Репер секогаш се развојните цели дефинирани во спецификациите. Затоа, новата „Panamera“ мора да блесне овде и сега, особено во однос на перформансите, удобноста и акустиката“, вели шефот за тестирање Марсел Хенеман.
Во „Porsche“, оптималните перформанси се неразделна карактеристика на вистинскиот погон. Со промената на моделот, „Panamera“ добива фундаментално обновена палета на мотори со современ фокус на одржливо возење и ефикасност.
„Откако веќе донесовме три е-хибриди на пазарот за втората генерација на „Panamera“, ќе понудиме и четврти „plug-in“ хибрид во новата „Panamera“. На овој начин одговараме на огромната побарувачка на нашите клиенти. Во некои земји, уделот на е-хибрид во „Panamera“ е речиси 100 проценти. Новиот дериват е модел со високи перформанси кој совршено се вклопува во сестраната линија“, објави д-р Томас Фримут, шеф на серијата „Panamera“.
„Ги зголемуваме електричните перформанси на „Panamera“ во сите е-хибридни модели во областа на динамиката на возење и во важните дисциплини на електричниот опсег и брзината на полнење. Во нашите тестови, можеме да го возиме новиот автомобил до 70 проценти подалеку со чисто електрична енергија отколку со неговиот претходник“, вели Фримут.
За време на тест-возењата, новата „Panamera“ ги доживува последните детали пред нејзината светска премиера. „Porsche“ ја претставува третата генерација на спортски автомобил со четири врати на фестивалот „Icons of Porsche“ во Дубаи на 24-ти ноември 2023-та година. Новата „Panamera“ ќе биде изложена пред посетителите на фестивалот на 25-ти и 26-ти ноември 2023-та година.
