До август 2023-та година, повеќе од 150.000 примероци на електричниот првенец „Polestar 2“ излегоа од фабричките монтажни линии.
„Polestar 2“ беше првиот електричен автомобил за масовно производство на шведската марка во кинеска сопственост, кој започна да се произведува во 2020-та година. Во рок од три години се направени преку 150.000 автомобили, се пофали производителот.
Над 20.000 возила се најдоа до клиентите во Британија и уште 3.000 автомобили беа испорачани во Австралија. Така, „Polestar“ стана најбрзо растечки автомобилски бренд во првите седум месеци од 2023-та година, со 174% зголемување на бројот на регистрации на нови возила во споредба со истиот период од минатата година.
Шведскиот бренд полека, но сигурно влегува во мејнстримот. Во овој поглед, менаџерите и инженерите не оставаат ништо на случајноста и веќе почнаа да испорачуваат подобрена верзија, која имаше големо влијание врз растот на продажбата.
„Надградениот „Polestar 2“ е најдобрата верзија досега. Со подобрен софтвер, хардверски промени, подолг дострел и побрзо полнење, ова е основата на која продолжуваме да го развиваме нашиот бизнис“, вели Томас Ингенлат, извршен директор на „Polestar“.
Сопствениците на надградениот модел „Polestar 2“ можат да патуваат до 22% повеќе, да трошат до 9% помалку енергија, додека батеријата може да се полни до 34% побрзо.
Моторот на „Polestar 2 Long Range Single“ сега е сертифициран за автономија до 654 km според протоколот „WLTP“, а максималната брзина на полнење сега е до 205 kW за верзиите со новата батерија од 82 kWh.
Новите мотори се поефикасни, а префрлањето на погон на задните тркала за верзиите со еден мотор значи дека „Polestar 2“ е уште позабавен за возење, иако помоќната и помалку автономната верзија со два мотори „AWD“ останува во понуда.
