Некогаш Владимир Путин беше човек кој требаше да се види. Во неколку недели пред руската инвазија на Украина, светските лидери се собраа во Москва за да го повикаат рускиот претседател да се повлече од работ на војната и да се откаже од какви било планови за напад.
Тие напори не успеаја, но човекот кој ја започна катастрофалната војна сега има исклучително ограничени можности за патување. Тоа може да изгледа тривијално за човек кој владее со земја која опфаќа 11 временски зони – сепак Путин има отворена врата за Пекинг, а лидерите пријателски настроени кон Кремљ од Централна Азија и Иран му посакаа добредојде од почетокот на инвазијата во февруари 2022 година. Се разбира, секогаш ќе го има Минск – Белорускиот претседател Александар Лукашенко, кој на Русија и обезбеди платформа за инвазија, беше домаќин и на Путин, пишува Нејтан Хоџ во анализа за Си-Ен-Ен.
Како и да е, Путин ќе биде забележливо отсутен од клучниот глобален форум оваа недела – самитот на БРИКС во Јоханесбург, а неговото непојавување доволно зборува за изолацијата на Русија и намалувањето на хоризонтите на Путин, наведува Хоџ.
Лидерите на другите членки на економскиот блок – јужноафриканскиот претседател Сирил Рамафоса, кинескиот Си Џинпинг, Бразилецот Лула да Силва и индискиот премиер Нарендра Моди – се очекува да бидат таму.
Минатиот месец, канцеларијата на Рамафоса објави дека Путин нема да присуствува на самитот со „взаемен договор“. На негово место ќе се појави рускиот министер за надворешни работи Сергеј Лавров, иако руските државни медиуми објавија дека Путин ќе се појави преку видео врска.
Учеството во меѓународен разговор може да биде пригоден начин да се дејствува како играч на глобалната сцена, но Путин пропушта повеќе од само уште една групна фотографија, вели Хоџ.
Тој посочува дека Путин е цврст поддржувач на „мултиполарниот светски поредок“, промовирајќи структури како БРИКС, кој беше формиран според негова идеја, како противтежа на американските и западните институции кои остро ја осудија Русија за војната во Украина. Иако дејствијата на Русија можеби предизвикаа широко распространета осуда од Западот, таа и понатаму е заклучена во кампања за меѓународно влијание и поддршка, особено ширум глобалниот југ.
Поттикнувањето таква поддршка во позадина на војната во Украина беше клучна цел на неодамнешниот самит на Путин во Санкт Петербург, Русија-Африка, според Хоџ. Одѕивот на африканските лидери можеби го разочараа Кремљ – помалку од половина од шефовите на држави кои присуствуваа на слична конференција во 2019 година се појавија на настанот минатиот месец – но руската надворешна политика продолжува да се потпира на дипломатска и политичка поддршка од земјите низ Африка, Латинска Америка и Азија, пишува Хоџ.
За почеток, тука е прашањето на налогот на Меѓународниот кривичен суд (МКС) за негово апсење поради наводната шема за депортирање на украински деца во Русија. Потерницата ја доведе Јужна Африка во неволја – како потписничка на договорот со кој се уредува Хашкиот трибунал, земјата е обврзана да уапси лица обвинети од МКС, рече Хоџ.
Кремљ, се разбира, се згрозува од помислата дека Путин го пропушта самитот на БРИКС поради налог на МКС. Портпаролот Дмитриј Песков ги негираше наводите на Рамафоса дека Русија ќе го смета апсењето на Путин за „објавување војна“, а на самиот Путин на 29 јули им рече на новинарите дека не мисли дека неговото присуство на БРИКС е „поважно од моето присуство сега во Русија“, како што беше објавено од ТАСС.
Настрана мотивот, тоа што Путин не се појави на самитот не е добро за Москва. Но, Русија продолжува со ПР кампања која ја прикажува земјата како цврста антиколонијална сила која поддржува поправеден светски поредок, истакнува Хоџ.
Во неодамна објавеното интервју, Лавров ги истакна главните точки на разговорот.
-Се согласувам дека концептот на западна доминација што го промовираат САД и нивните подредени земји не обезбедува хармоничен развој на целото човештво. Напротив, треба да се справиме со бескрајната потрага на западното малцинство за воена, политичка, финансиска и економска експанзија. Нивните слогани се менуваат – промовираат глобализација, западнизација, американизација, универзализација, либерализација. Но, суштината останува иста – тие се стремат да го потчинат секој независен играч и да го принудат да игра според правилата што му користат на Западот – рече тој.
САД и нивните сојузници, продолжи Лавров, „се обидуваат да ја забават природната еволуција на меѓународните односи и формирањето на мултиполарен систем, па дури и да го променат процесот“.
-Тие не бегаат од употреба на несоодветни и незаконски методи, вклучително и употреба на сила или унилатерални санкции, информативна и психолошка војна итн., за да го наведнат светот на нивните потреби – рече тој.
Иронијата овде е доста богата. Русија, на крајот на краиштата, води војна во Украина која Путин ја оправда во империјална смисла, рече Хоџ, мислејќи на споредбите на Путин со Петар Велики.
Крајот на униполарниот свет, според мислењето на Путин, се чини дека значи дека Русија може да се вклучи во крвава окупација на Украина, неограничена од меѓународните норми и под лажно знаме на ослободување, заклучи Хоџ.
Самитот на БРИКС ќе се одржи од 22 до 24. август во Јоханесбург.
