Растот на платите во Британија се забрза повеќе од очекуваното на ниво за кое гувернерот на Банката на Англија, Ендрју Бејли рече дека ја поттикнува инфлацијата, задржувајќи го притисокот врз регулаторот дополнително да ја заостри монетарната политика.
Просечната неделна заработка, без бонусите, порасна за 7,3% во периодот март-мај, откако бројките за февруари-април беа ревидирани нагоре, соопшти британската канцеларија за статистика. Економистите очекуваа растот на платите да биде 7,1%.
„Денешните податоци потврдуваат дека пазарот на трудот е сè уште претесен бидејќи растот на платите останува доста висок“, рече Јаел Селфин, главен економист во „KPMG UK“.
Извештајот на заводот за статистика ќе им помогне на претставниците на АЦБ да донесат одлука на нивниот следен состанок на 3-ти август за прилагодување на стапката.
Пазарните прогнози покажуваат дека трговците очекуваат АЦБ да ги зголеми каматните стапки за уште 150 базични поени до март 2024-та година, што би ја зголемило основната стапка на 6,5%. За споредба, каматната стапка на Европската централна банка (ЕЦБ) достигнува 4 отсто, а на Федералните резерви на САД од 5,5 отсто.
„Нашиот пазар на труд е силен со невработеност ниска според историските стандарди“, рече канцеларот на благајната Џереми Хант.
„Но, сè уште имаме околу 1 милион слободни работни места, што уште повеќе ја зголемува инфлацијата. Нашите реформи на пазарот на трудот, вклучително и продолжување на бесплатната грижа за децата следната година, ќе помогнат да се изгради економија со високи плати, силен раст и пригушена инфлација што сите сакаме да ги видиме“, додаде тој.
Извештајот на заводот за статистика, исто така, покажа силен раст на вработеноста, како и неочекуван пораст на стапката на невработеност на 4% бидејќи повеќе луѓе бараат работа, знак дека притисоците на пазарот на трудот можеби почнуваат да се намалуваат. Бројот на луѓе кои работат скокна за 102.000 луѓе во последниот квартал, што е повеќе од 85.000 луѓе што ги очекуваа економистите.
„Пазарот на трудот ја менува насоката“, вели Џејми Раш, главен економист во „Bloomberg Economics“.
„Треба само да видиме потврда во податоците за инфлацијата за АЦБ да отфрли зголемување од 50 базични поени“, додава тој.
Претставниците на регулаторот, предводени од Бејли, се загрижени дека инфлацијата останува четири пати поголема од нивната цел од 2 отсто, при што работниците бараат повисоки плати за да го надоместат намалувањето на нивниот животен стандард поради зголемените цени. Податоците за инфлацијата се очекува да бидат објавени на 19-ти јули.
Растот на трудовиот надоместок, без бонусите, во приватниот сектор достигна 7,7%, што е најбрза стапка на раст од пандемијата. Платите во јавниот сектор, пак, се зголемија со најбрзо темпо од 2001-ва година.
Затегнатоста на пазарот на труд е еден од главните фактори кои ја поттикнуваат инфлацијата во Обединетото Кралство, која останува побрза од која било друга земја на Г7.
Бејли во понеделникот предупреди дека притисоците врз платите во моментов се премногу силни за да го ограничат растот на цените во земјата.
„И зголемувањето на цените и на платите со сегашните стапки не се во согласност со целта на инфлацијата“, истакна Бејли, додавајќи: „Интеракцијата на вкупната инфлација останува над целта со затегнувањето на пазарот на трудот и притисоците врз побарувачката во економијата, што предизвика движења во инфлацијата на цените на стоките и услугите“.
Повеќе од 600.000 луѓе ги напуштија своите работни места за време на пандемијата, принудувајќи ги компаниите да понудат повисоки плати за да го привлечат новиот персонал што им е потребен. Бејли рече дека работодавците, исто така, складирале работници откако се соочиле со тешкотии при вработување, одржувајќи ја невработеноста на екстремно ниско ниво.
Овој месечен извештај покажа дека уделот на лицата класифицирани како економски неактивни – не работат или бараат работа – падна за 0,4 процентни поени во споредба со претходниот квартал на 20,8%. Индикаторот сега е за 0,6 поени повисок од нивото пред пандемијата.
АЦБ беше принудена да го забрза темпото на зголемување на стапката минатиот месец по многу посилни од очекуваните податоци за пазарот на трудот и инфлацијата. Инвеститорите се едногласни дека стапките ќе се зголемат на 5,5% во август и на врвот од 6,5% на почетокот на следната година.
„Денешните податоци нема да направат ништо за да ја убедат (АЦБ) дека пазарот на трудот повеќе не е затегнат, оставајќи (регулаторот) да заклучи дека монетарната политика треба дополнително да се заостри“, рече Стјуарт Кол, главен макро економист во „Equiti Capital“.
„Тешко е да не се заклучи дека треба да се направи значителна работа ако инфлацијата треба да се врати под контрола“, додава тој.
