Групацијата Крка во првата половина од годината ги зголеми приходите од продажба за седум отсто, на 920,4 милиони евра. Нето добивката изнесува 170,1 милиони евра и во однос на истиот период лани кога се забележани големи приходи од позитивни курсни разлики е за 28 отсто помала, пишува Крка во оценката за работењето.
Податоци за минатогодишното работење и оценка на овогодинешното работење денеска на генералниот состанок презентираше претседателот на Управниот одбор и генерален директор Јоже Коларич.
„Растевме во сите продажни региони и во сите групи на производи и услуги. Проценетиот раст на продажбата од седум проценти е добар и ја надминува стратешката цел на Крка“, рече тој.
Како што објави Крка преку веб-страницата на Љубљанската берза, проценетата нето добивка на групацијата надмина 50 отсто од планираното за целата 2023 година. Во споредба со прилагодениот EBIT во истиот период минатата година, и покрај инфлациските притисоци, проценетиот оперативен профит на групацијата (EBIT) се зголемил повеќе од продажбата, за девет проценти. Со ова го постигнавме највисокиот полугодишен EBIT во историјата на Крка, додаде тој.
Во однос на продажбата, најголем регион бил Источна Европа, каде во првата половина од годинава се продадени производи во вредност од 300,5 милиони евра. Во Руската Федерација, најголемиот единствен пазар на Крка, продадени се производи во вредност од 179,8 милиони евра, што е четири отсто повеќе во однос на истиот период лани. Во Украина продале производи за 38,6 милиони евра или 16 отсто помалку.
Следи регионот на Централна Европа каде се продадени 212,9 милиони евра производи. Во Полска, вториот по големина единствен пазар на Крка, се продадени производи во вредност од 93,1 милиони евра или пет отсто повеќе. Трет најголем обем на продажба беше регионот на Западна Европа со 181,4 милиони евра. Во Германија, најголемиот пазар во овој регион и трет поединечен пазар на Крка, тие се продадени за 49,2 милиони евра или четири отсто повеќе.
На домашниот пазар се продадени за 56,6 милиони евра. Според последните расположливи податоци, со вредносен пазарен удел од 7,3 отсто, тие ја задржале водечката позиција меѓу давателите на лекови, пишува Крка.
Во Групацијата Крка, која на крајот на јуни вработила 11.653 работници, за инвестиции во првата половина од годинава се издвоени 45,6 милиони евра. Од нив 36,5 милиони евра се инвестиции во матичната компанија.
Според нивната проценка, продажбата на производи и услуги на концернот годинава треба да достигне 1,755 милијарди евра. Планираат околу 300 милиони евра нето добивка и зголемување на бројот на вработени во Словенија и во странство, вкупно два отсто. Планираните инвестиции во износ од 130 милиони евра првенствено ќе бидат насочени кон зголемување и технолошко осовременување на производните и развојните капацитети и инфраструктурата.
Надзорниот одбор на редовна седница на 19 јули ќе ги разгледува неревидираните резултати од работењето на Групацијата „Крка“ и компанијата „Крка“ во првата половина од оваа година, а ден подоцна ќе и бидат претставени на јавноста, најави Крка.
