„Nissan“ се соочува со сериозен проблем во производството на спортскиот автомобил „Z“. Според „Driver Web“, тоа е поврзано со автоматизираниот процес на боење на каросеријата што се користи во фабриката на марката во Точиги, Јапонија.
Не е наведена конкретна причина, но се вели дека значително го забавува производството и на „Nissan Z“ и на електричниот кросовер „Araya“, кој се склопува на иста лента.
Официјалното објаснување од „Nissan“ е недостигот на полупроводници, што го спречува нормалното производство по пандемијата. Проблемот со бојата веќе влијаеше на продажбата на „Nissan Z“. Така, од јануари до мај 2023-та година, во Јапонија беа регистрирани 435 спортски автомобили, а во мај само 67. Во САД, „Nissan“ успеа да испорача 466 единици од „Z“ во првиот квартал од оваа година.
За споредба, во истиот период, „Toyota“ испорача 871 примерок од „GR Supra“, што чини повеќе, во САД. „Nissan“ во моментов има над 5.000 заостанати нарачки за спортското купе, а за производство на овие автомобили ќе бидат потребни повеќе од 5 години, што е рекорд во индустријата.
Фабриката во Точиги работи со автоматизиран систем за контрола на бојата. Квалитетот го следат 11 роботи способни да детектираат прашина до 0,3 милиметри, што би требало да спречи и најмали дефекти. Сепак, системот е релативно нов и затоа не се исклучуваат дефекти и поврзани доцнења.
„Nissan“ планира да го зголеми обемот на работа на фабриката со производство на „Z Nismo“, врвната верзија на моделот, која официјално ќе биде претставена во текот на летото.
