„Дијамантите се најдобриот пријател на една девојка“, како што се пее во една старата песна, но тие не се омилени на инвеститорите во моментов.
Скапоцените камења изгубија значителна вредност во текот на изминатите неколку месеци, при што цените се намалени за 18% од нивните највисоки нивоа на сите времиња во февруари 2022-ра година и намалени за 6,5% од годината до денес, според Глобалниот индекс на цените на грубиот дијамант, пишува „CNBC“.
Нивната вредност е на пат да тоне уште повеќе, предвидуваат пазарните набљудувачи.
„Природен дијамант од 1 карат со малку подобар квалитет од просечниот беше вреден 6.700 долари пред една година, денес истиот дијамант се продава за 5.300 долари“, изјави за „CNBC“ Пол Зимниски, извршен директор на „Paul Zimnisky Diamond Analytics“.
Цените на дијамантите, заедно со оние на другите слични средства, забележаа добивки за време на пандемијата со Ковид-19 кога „исполнети со средства од програмите за економски стимулации, потрошувачите беа желни да ги потрошат на вредни подароци за своите најблиски“, според консултантската фирма „Bain & Company“ во извештај од февруари минатата година.
Кога луѓето не можеа да патуваат или да јадат надвор, целата таа дополнителна готовина одеше за луксузни стоки и накит, вели извршниот директор на „Angara Jewelry“, Анкур Дага. И како што економијата почна повторно да се отвора, цените на дијамантите почнаа да забавуваат и да се лизгаат во „остар пад“, додава тој.
Континуираната конкуренција од лабораториски дијаманти, побавното кинеско економско закрепнување и неизвесното макроекономско опкружување, исто така, одиграа улога во слабиот пазар, според индустриските експерти.
„Совршена замена?
Се поголем број потрошувачи се свртуваат кон лабораториски дијаманти, вели Едан Голан, извршен директор на „Edahn Golan Diamond Research & Data“.
„Уделот на продажбата на овие дијаманти во споредба со природните дијаманти се зголемува – во 2020-та година беше само 2,4%, а до денес веќе е до 9,3%,“ вели тој.
Дијамантите кои се одгледуваат во лабораторија се произведуваат во контролирана средина користејќи екстремен притисок и топлина. Тие се хемиски, физички и оптички идентични со природните дијаманти и се сметаат за „совршена замена“, вели Анкур Дага од „Angara Jewelry“. Уште поважно, тие се многу поевтини и се повеќе луѓе ги бараат за настани како ангажмани.
„Лабораториски дијамант не се разликува од ископаниот, и ако можам да добијам поголем за иста цена, зошто да не?“, вели Дага.
Тој додава дека неговата свршеница сакала помал камен и не сакала да потроши преголема сума за прстенот, пренесува „CNBC“.
Цените на дијамантите одгледани во лабораторија исто така се во опаѓање, паѓајќи за 59% во текот на изминатите три години, забележува Едан Голан.
Според Анкур Дага, тоа се должи на пониските цени на машините кои стануваат поефикасни во производството на повеќе вештачки дијаманти.
Во надолно сценарио, тој очекува цените на природните дијаманти да се намалат помеѓу 20% и 25% од сегашните цени во следните 12 месеци, што би било пад од 40% од врвот во февруари.
„Постојаниот пад на цените е многу веројатно сценарио, особено затоа што маржите на трговците на мало за лабораториски дијаманти се особено високи, околу 60%, во споредба со 34% за природните дијаманти“, вели Голан.
Покрај тоа, набљудувачите на пазарот на дијаманти не очекуваат санкциите против водечкиот светски производител, Русија, да доведат до големи скокови на цените.
Во мај, Г-7 свика дискусија за воведување санкции за руските дијаманти, при што Велика Британија го презеде водството во санкционирањето на руската државна компанија „Алроса“.
Според Едан, Русија нема да има проблеми да ги продаде своите дијаманти и покрај санкциите.
„Земјите како Индија, ОАЕ, па дури и ЕУ не воведоа санкции за увоз на груби дијаманти. Така што не можеме да зборуваме за реален недостиг“, коментира тој.
Русија е најголемиот светски производител на дијаманти, а потоа следат Боцвана и Демократска Република Конго.
Индија е најголемиот увозник на дијаманти во светот, со САД на второ место, а потоа следат Хонг Конг, Белгија и ОАЕ.
