Шефот на OpenAI, Сем Алтман, е многу гласен во залагањето за употреба на вештачка интелигенција во сите сфери на животот. ChatGPT, кој OpenAI го развиваше со години, воодушеви милиони ширум светот, но исто така покрена цела низа прашања поврзани со регулирањето на развојот и употребата на вештачката интелигенција.
Но, се чини дека самата употреба на оваа алатка со погон на вештачка интелигенција може да биде доведена во прашање во Европа. За време на неговата „турнеја“ низ Европа, Алтман им откри на новинарите дека постои можност ChatGPT да престане да работи во Европската унија, доколку се прифати сегашниот предлог на Законот за вештачка интелигенција.
Ќе се обидеме да ги почитуваме правилата, но ако не можеме, ќе престанеме да работиме. Деталите се навистина важни, изјави Алтман за новинарите.
Да потсетиме, Европската Унија активно работи на создавање правна рамка за развој на вештачка интелигенција, што би бил прв ваков закон во светот. По расправата во Европскиот парламент, Законот за вештачка интелигенција треба да биде усвоен до крајот на јуни.
Алтман, наводно, е загрижен дека системите како ChatGPT би можеле да бидат означени како „висок ризик“ во европското право, што на крајот би значело дека OpenAI ќе мора да исполни цела серија барања поврзани со безбедноста и транспарентноста.
Имено, според предложените правила, би биле забранети системи за вештачка интелигенција кои се означени како „висок ризик“ и чија употреба би „создала неприфатлив ризик“. Пример е типот на систем што се користи во Кина кој има социјално бодување.
Правилата, исто така, бараат компаниите што создаваат вештачка интелигенција да вклучат опција при дизајнирање на оние модели што го спречува создавањето на нелегална содржина и да објават информации заштитени со авторски права што се користат за обука.
Интересно е што аргументите на Алтман се во спротивност со она што го изјави пред американскиот Сенат, каде што посочи дека треба да има владина агенција која ќе ги надгледува проектите за вештачка интелигенција кои надминуваат одредени нивоа на способност. Тој предложи на компаниите да им се доделат лиценци кои ќе бидат одземени доколку компаниите ги прекршат правилата за безбедност.
