Профитот на „HSBC“ скокна до рекордно ниво во првиот квартал, со што банкарскиот гигант со седиште во Лондон стана еден од најголемите корисници на новата ера на повисоки каматни стапки и повторното отворање на Кина.
Банката објави дека нејзиниот профит се зголемил речиси четирикратно во однос на претходната година на 10,3 милијарди долари во првите три месеци од 2023-та година, што е негов највисок квартален извештај, според „S&P Global Market Intelligence“. „HSBC“ соопшти дека ќе ја исплати својата прва квартална дивиденда од 2019-та година, откако ги суспендираше за време на пандемијата, и ќе откупи акции вредни до 2 милијарди американски долари.
Дивидендата и откупот веројатно ќе го намалат притисокот врз „HSBC“, најголемата европска банка по пазарна вредност, по едногодишниот обид на нејзиниот најголем акционер, кинескиот „Ping An Insurance“, да ја реструктуира банката на начин што ќе ги изолира азиските операции од другите единици околу светот.
Акциите на лондонската банка пораснаа за 5% на денешното тргување.
Добивката пред оданочување се зголеми поради два привремени фактори: купувањето на одделот за Обединетото Кралство на „Silicon Valley Bank“ и обновените преговори за продажба на француската единица за банкарство на мало.
„HSBC“ известува дека има корист и од потрајните трендови. Зголемените каматни стапки ѝ овозможија повеќе да им наплаќа на заемопримачите. Сепак, банката сè уште не се соочува со доволно конкурентен притисок да ја зголеми стапката што им ја плаќа на штедачите за пропорционален износ.
Нето приходите од камати достигнаа 8,96 милијарди долари во првиот квартал, зголемувајќи ги приходите на повеќе од 20 милијарди долари, околу две третини повеќе од првиот квартал од 2022-ра година.
Повторното отворање на Хонг Конг и континентална Кина по неколку години строги ограничувања за борба против Ковид-19 доведе до заживување на бизнисот, коментираше извршниот директор Ноел Квин, цитиран од „WSJ“.
„HSBC“ ќе го одржи годишното собрание на акционери во петок во Англија. Акционерите треба да гласаат за резолуција со која се повикува „HSBC“ редовно да ги разгледува опциите за структурни промени, вклучително и потенцијален спин-оф.
Пинг Ан се залага „HSBC“ да се реструктуира на начин што би ги изолирал неговите азиски операции од другите единици, потег за кој акционерот рече дека може да ја зголеми заработката и вредноста на акциите. „HSBC“ се спротивстави на потегот, тврдејќи дека тоа ќе ја поткопа стратегијата на банката за поврзување на бизниси и региони низ целиот свет.
„HSBC“ е со седиште во Лондон, но најголемиот дел од нејзината добивка пред оданочување доаѓа од нејзиниот бизнис во Азија, каде што банката префрла повеќе ресурси, додека излегува или ги намалува клучните пазари во Северна Америка и делови од Европа.
