Пребарувачите базирани на вештачка интелигенција брзо стануваат закана каква што Google ја немал во последните 25 години.
Првиот ладен туш за раководителите на Google дојде кога дознаа дека Samsung размислува да го замени Google со Bing на Microsoft како стандарден пребарувач на неговите уреди.
Во Google панично реагираа на соопштението на јужнокорејскиот гигант, што не е чудно со оглед на тоа што договорот со Samsung им носи околу три милијарди долари приход. Договорот со Apple, кој треба да биде обновен оваа година, им носи дополнителни 20 милијарди.
Заканата од Samsung ја претставува првата потенцијална пукнатина во навидум непробојниот бизнис за пребарување на Google, чија вредност минатата година изнесуваше 162 милијарди долари.
По објавувањето на веста, акциите на мајката-компанијата на Google „Alphabet“ паднаа за 4%.
„Маги“ како единствен спас
Околу две недели откако Open AI го објави ChatGPT, беше формирана работна група во одделот за пребарување на Google чија цел беше изградба на различни производи за вештачка интелигенција.
Според внатрешните документи што ги видел „Њујорк тајмс“, Google веќе работи на сосема нов пребарувач со вештачка интелигенција.
Новите способности, кои се во развој под капата на проектот „Маги“, се создадени од дизајнери, инженери и менаџери кои работат во таканаречените „спринт“ простории за да ги приспособат и тестираат најновите верзии. Ги има вкупно 160.
Новиот прелистувач треба да им понуди на корисниците персонализирано искуство кое се обидува да ги предвиди потребите на корисниците и да комуницира со нив за да ги добие сите потребни повратни информации.
Google веќе неколку години користи големи јазични модели за да ги подобри резултатите од пребарувањето, но се повлече од целосното усвојување на вештачката интелигенција бидејќи, како што рекоа во тоа време, беше склона да генерира лажни и пристрасни одговори.
Меѓутоа, тие ставови во меѓувреме омекнаа.
По ChatGPT и порастот на вештачката интелигенција во изминатите неколку месеци, главен приоритет на Google стана да го долови она што е „следната голема работа“ во индустријата.
Затоа гигантот минатиот месец објави сопствен чет-бот Bard, но технологијата наиде на различни критики при лансирањето.
Google со години спроведува опсежни истражувања на полето на вештачката интелигенција, а неговата лабораторија DeepMind во Лондон се смета за еден од најдобрите истражувачки центри за вештачка интелигенција во светот.
