Промените во ноктите можат да бидат знак за рак на кожата, а Американската академија за дерматологија предупредува дека темните линии, испакнатините и промената на бојата на кожата околу ноктите може да укажуваат на сериозни здравствени проблеми.
Американската академија за дерматологија наведува дека на вашите нокти може да се видат тивки знаци на меланом, рак на кожата. Иако ретко се случува ракот на кожата, вклучително и меланом, да се развие под и околу ноктите, тоа навистина се случува.
Според гореспоменатата академија, постојат пет знаци на кои треба да внимавате на вашите нокти кои може да укажуваат на тоа дека имате меланом.
Темна линија – овој феномен може да се појави како кафена или црна лента на ноктот. Најчесто се појавува на палецот на вашата доминантна рака или стапало. Сепак, може да се појави на кој било нокт.
Темна кожа во близина на ноктот – Според Американската академија за дерматологија, кога кожата околу ноктот станува потемна, тоа може да биде знак за напреднат меланом.
Подигање на ноктите – Ноктот што се одвојува од кожата може да биде знак за оваа сериозна болест. „Кога тоа ќе се случи, вашиот нокт почнува да се одвојува од кожата. Белиот слободен раб на врвот на ноктот ќе изгледа подолг додека ноктот се крева“, велат од академијата.
Пукање на ноктите – Друг знак на меланом може да биде пукањето на средина на ноктите.
Испакнатини на ноктот – Обрнете внимание ако забележите испакнатина под ноктот. Овој феномен може да биде придружен со лента во боја која може да биде широка и неправилна или темна и тесна.
„Добрата вест е дека меланомот, дури и на ноктите, е многу излечив кога е рано фатен“, наведува Американската академија за дерматологија. Затоа е корисно да знаете на што да внимавате и редовно да ги проверувате ноктите, а исто така препорачливо е да внимавате и на други помалку очигледни области, како линијата на косата, зад ушите, стапалата и рацете.
