Колку е важна платата на функционерите во борбата против корупцијата?

Уставниот суд минатата недела со одлука за укинување на два члена од Законот за плата и надоместоци на функционерите, овозможи зголемување на платите на државните функционери за 78 отсто. Со ова се опфатени и уставните судии, но и платите на премиерот, претседателот, собранискиот спикер и сите вршители на јавни функции. Повисоки плати од идниот месец треба да „легнат“ и на сметките на заменици министри, градоначалници, директори во државни фирми и агенции. Според висок извор од Финансии, покачување би добиле помеѓу 500 и 600 функционери, иако ниту Антикорупциската комисија не можеше да пресмета колку избрани и именувани функционери има во државата.

Со оваа одлука, најмалку 5 милиони евра годишно граѓаните ќе ги чини зголемувањето на платите на функционерите, според пресметките на Министерството за финансии.

Според извори од Министерството, укинувањето на двата члена од Законот е практично усогласување со закон, бидејќи основицата 11 години била замрзната. Ставот е дека доколку двата члена кои ги укина Уставниот суд не биле донесени по природен пат, платите на функционерите веќе би биле на ниво на новото покачување.

По големите ракции во јавноста, се чека Владата да „пресече“ за ова прашање, а министрите најавуваат дека ќе ја почитуваат одлуката.. Сепак тие, суптилно порачаа дека е „демагогија ако некој каже дека платата не е важна“, а прашањето за месечните примања на политичарите го поврзаа и во контекст на борбата против корупцијата, но и како важен фактор за привлекување квалитетни кадри во политиката.