Претседателот на Управниот одбор на НЛБ Групацијата, Блаж Броњак на вчерашната прес-конференција во рамки на Денот на словенечкиот пазар на капитал, апелираше да се смири паниката околу банкарскиот сектор.
„Сензационализмот за тоа кој ќе биде следен по Credit Suisse и дали тоа можеби е Deutsche Bank, никому не му користи. Замислете што значи ова за Deutsche Bank, која направи многу во последните неколку години за да се преструктуира и да се позиционира како сериозна банка, што помалку се однесува на инвестициско банкарство, а повеќе на работа со клиенти. Медиумите покажуваат со прст кон неа и велат: тие се следните. И тоа можеби е некакво самоисполнувачко пророштво. Сега таа се брани. Запрашајте се што значи ова за јавните финансии? Ако Deutsche Bank падне, тоа ќе значи товар од 200 до 300 милијарди евра за германските јавни финансии. Кој е во интерес да се крене паника“, децидно рече Бродњак на прес-конференцијата на почетокот на денот на словенечкиот пазар на капитал.
Претседателот на УО на НЛБ посочува дека не можеме да ги поистоветуваме ризичните американски банки со централноевропските банки:
„Зборуваме за два паралелни света на банкарската индустрија. Едниот се големите светски инвестициски банки, кои имаат 80 проценти од хартиите од вредност во својот биланс на состојба и се многу изложени на ревалоризација на овие хартии од вредност, а освен тоа, тие значително повеќе се задолжуваат на меѓународните пазари. Во меѓувреме, централните европски банки се многу строго регулирани од ЕЦБ во последните години и се рефинансираат со свои пари. Издаваме обврзници на меѓународните пазари затоа што регулативата го налага тоа. Ја зајакнавме и капиталната сила, денес адекватноста на капиталот е речиси 20%, што е значително над минималните барања. Ликвидноста е исто така исклучително робусна, што се однесува на централноевропскиот банкарски систем како целина“.
Бродњак ги потврди високите ликвидни резерви со релевантни бројки: „Односот меѓу кредитите и депозитите е над 60 отсто. Тоа значи дека сите централноевропски банки имаат високи ликвидносни резерви, кои се депонирани или во готовина – во билансите кај централните банки – или во обврзници на Република Словенија, Германија…
Првиот човек на НЛБ додаде дека банките од Централна Европа не финансираат старт-ап компании или крипто проекти: „Затоа што не верувам дека криптото е средство, а камоли валута, туку тоа се само белешки во некои системи за кои нема покритие. Исто така, дозволете ми да истакнам дека пропаднатата Silicon |Valley Bank не била регулирана и не пријавила метрика за ликвидност. ЕЦБ ни ‘пука’ на месечно ниво, коефициентите на ликвидност ни се трипати повисоки од законските, само во НЛБ имаме пет милијарди евра вишок резерви, но не знаеме каде да одиме со нив, бидејќи Банката на Словенија речиси го забранува финансирањето на домаќинствата во нормални услови, ајде да не паничиме!”
