Гасоводот „Јужен Поток“ не е само енергетски, туку тоа ќе биде и коридор на мирот во балканскиот и кавкаскиот регион, изјави турскиот министер за надворешни работи Ахмет Давутоглу во обраќањето на Меѓународен енергетски форум, што се одржува во Њујорк.
Давутоглу, како што јави Анадолија, нагласи дека на Европа и се неопходни нови проекти кои ќе обезбедат сигурност на енергетскиот сектор и нивната реализација претставува најдобра алтернатива за европскиот континент.
Според Давутоглу, изградбата на новите енергетски коридори ќе придонесе за стабилизација на регионите на Балканот и Кавказот, кои по завршувањето на Студената војна долго време беа третирани како зони на нестабилност.
Давутоглу нагласи дека со изградбата на нафтоводите и гасоводите со кои реонот на Кавказот и Блискиот Исток ќе се поврзат со Европа, ќе се обезбеди енергетска сигурност, а воедно тие воесно позитивно ќе влијаат на развојот на сите земји низ кои ќе минуваат.
Заедно со изградбата на нови железнички линии и патната инфраструктура, енергетските проекти чија што реализација е во тек или се планира за следните години, ќе придонесе за нови начини на комуникација на целиот регион, зкалучи Давутоглу.
