Руски борбен авион Су-27 во вторникот го погоди пропелерот на американското воено беспилотно летало Reaper, предизвикувајќи леталото без екипаж да се урне во Црното Море.
Американски дрон Reaper и два руски SU-27 Flanker летале над меѓународните води кога еден од руските авиони намерно прелетал пред дронот и истурил гориво пред него, по што еден од авионите се судрил со дронот при што го оштетил неговиот заден пропелер, тврди американски функционер запознаен со инцидентот.
Американската војска соопшти дека инцидентот следел образец на опасно однесување на руските пилоти кои оперирале во близина на авиони со кои летаат САД и нивните сојузници, вклучително и над Црното Море. Црното Море се наоѓа помеѓу Европа и Азија и се граничи со Русија и Украина, меѓу другите земји.
„Покрај несигурноста и непрофесионализмот, овој инцидент покажува и недостаток на способност“, се вели во соопштението на американската војска.
Од руското Министерство за одбрана, пак, соопштија дека руските ловци не пукале во дронот ниту пак на било каков начин биле во контакт со него.
„Како резултат на остро маневрирање околу 9:30 часот по московско време, беспилотното летало MQ-9 започна неконтролирано летање со губење на висината и се судри со површината на водата“, се вели во соопштението на руското Министерство. „Руските ловци не користеа оружје, не стапија во контакт со дронот и безбедно се вратија во својата домашна база.
За инцидентот бил информиран американскиот претседател Џо Бајден. Рускиот амбасадор Анатолиј Антонов беше поканет во Белата куќа, пренесува Интерфакс.
