Економската состојба на деловните субјекти во август годинава раководителите ја оценуваат како поповолна во однос на август минатата година, објави Државниот завод за статистика.
Нивната оценка за обезбеденоста на производството со порачки е понеповолна во однос на претходниот месец. Обемот на производството во август 2013 година е поповолен во однос на претходниот месец, очекувањата за обемот на производството во наредните три месеци се понеповолни, додека очекувањата за бројот на вработените се поповолни.
Залихите на суровини и репроматеријали, како и тековните набавки на суровини и репроматеријали во август годинава се под и околу нормалата. Залихите на готовите производи се зголемени во споредба со претходниот месец. Просечното искористување на капацитетите на деловните субјекти во август 2013 година изнесува 60,7 отсто од нормалното искористување.
Најголемо влијание на ограничувањето на обемот на производството, според раководителите на економските субјекти, се недоволната странска побарувачка со 26,8 отсто, недоволната домашна побарувачка со 18,7 отсто, неизвесното економско опкружување со 10,2 отсто и финансиските проблеми со 9,9 отсто.
