Рано е да се зборува за воен пораз на Русија, но Владимир Путин ја загуби гасната војна против Германија. Тоа веќе може да се каже со сигурност. Бидејќи Германија има најголеми капацитети за складирање природен гас во целата Европска унија, а бидејќи тие се уште се полни 90 проценти во средината на јануари, во екот на грејната сезона, тоа значи дека прекинот на снабдувањето со руски гас повеќе не е опасност.
Во времето на рускиот напад на Украина, пред речиси 11 месеци, Германија покриваше повеќе од половина од потребите со гас од Русија. Затоа, за Москва, уценувањето на Германија беше сржта на економскиот притисок врз ЕУ, кој беше создаден со цел да ја поткопа европската поддршка за украинскиот народ и неговата армија.
Германија е без Гаспром веќе пет месеци
Но, тој план не успеа. Германците не смрзнуваат во своите станови, не мора да ја запрат работата на фабриките, па дури и во официјален Берлин исчезна стравот дека Москва може да ја парализира земјата поради одмазда. Не, Германија се направи независна од јаглен и нафта од Русија во рамките на санкциите на ЕУ, а од крајот на август веќе не добива природен гас од Гаспром.
Со други зборови, Германците веќе пет месеци живеат без наводно суштинскиот руски гас и се чини дека најголемата европска економија добро се справува со тоа. Додуша, сè уште сметаме на рецесија, што не би било изненадување со оглед на прекинот на синџирите на снабдување и експлозијата на цените на енергенсите. Сепак, показателите продолжуваат да покажуваат дека веројатно ќе се работи за благ пад, па дури и рекордната инфлација забавува.
Во меѓувреме, Берлин ја зголемува воената поддршка за Киев, што може да се смета како уште еден индиректен показател за неуспехот на „специјалната операција за гас“ на Путин. На почетокот на јануари – и во тој момент во Германија складиштата за гас се полнат трета недела по ред, што е нетипично за тој период од годината – федералната влада се предомисли и одлучи да испрати оклопни возила во Украина. Може да следат и тешки борбени тенкови, дискусиите за тоа во моментов се во полн ек.
Потврда за деескалација на ситуацијата
Доказот дека Путин ја загуби гасната војна е јасна потврда за смирувањето на ситуацијата, која германската економија и населението ја добија истовремено од два извора: од државната регулаторна институција и од деловното здружение.
Прво, Федералната агенција за мрежа официјално утврди: „Недостигот на гас оваа зима станува се помалку веројатен.“ Во интервјуто, шефот на таа агенција, Клаус Милер, нагласи дека очекува флуктуациите на цената на гасот да завршат и да се стабилизираат на сегашното ниво. Додуша, тоа ниво е сè уште значително повисоко од претходно, но сепак е многукратно пониско од рекордните вредности забележани минатото лето. Со тие цени, германските производители кои трошат многу енергија можат да работат на стабилизирање на ситуацијата, оцени Милер.
Малку подоцна, Здружението на германски оператори за складирање гас и водород INES на својата редовна месечна прес-конференција ги презентираше сценаријата за 2023 година: доколку се задржат нормалните временски услови, капацитетот за складирање ќе биде 65 проценти до крајот на оваа зима. Тоа би било исклучително удобна почетна ситуација за складирање во текот на летото, па 100% зафатеност би се достигнала веќе во септември.
Со други зборови, професионалците им гарантираат на германските компании и домаќинства дека не треба да очекуваат проблеми со резервите на гас ниту оваа, ниту следната зима – под претпоставка дека „тековните заштеди на потрошувачите ќе останат на сегашното ниво“, објави ИНЕС.
Гаспром го загуби својот голем пазар
Сепак, експертите на INES развија и сценарио за најлош случај: значително ладење, достапноста на течен природен гас е драстично намалена поради многу високата побарувачка во Азија, Русија веднаш ги прекинува сите испораки на гас во Европа, што би довело до заеднички споделување на германските резерви со другите членки на ЕУ. Но, и во тој случај, во Германија не би имало недостиг на гас ниту во оваа ниту во следната грејна сезона.
Сè на сè, сето ова е убедлива потврда дека Путин навистина ја загуби гасната војна. Германија влезе во 2023 година без руски гас, но и без страв од таа загуба. Токму тука лежи поразот на Кремљ: рускиот природен гас повеќе не е соодветно оружје против Германија.
Последиците од таа изгубена гасна војна се се уште подалекусежни: државниот концерн Газпром го загуби својот најважен странски пазар. Имено, до пред само една година четвртина од вкупниот извоз одеше во Германија.
