Поранешниот директор на Царинската управа, Драган Даравелски, кому му се судеше во отсуство, побарал повторување на судската постапка.
Реотворањето на постапката и новото судење ќе значи укинување на пресудата според која тој е во „Идризово“, но и застарување на делото за кое се гонеше.
Даравелски се гони за дело злоупотреба на службената положба и овластувањето, кое, според обвинението, го сторил од 1999 до 2002 година. Кривичниот законик предвидува дека за делото може да бидат изречени максимум 10 години затвор.
Застарувањето е за дваесет години, односно во 2022 година. Ова ќе значи дека Даравелски ќе се спаси од кривичен прогон бидејќи делото е застарено.
Тој беше во бегство две децении. Вчера, беше уапсен на Табановце, каде што дошол сам и свесно. Бидејќи бил баран со потерница, беше спроведен директно во затвор во „Идризово“, од каде што набргу ќе излезе.
При обид да се стапи во контакт со адвокатот Душан Шарановиќ, кој го застапува Даравелски, тој не одговори на повикот за деталите за тоа кој го направил планот за враќање на ексдиректорот на Царина за да помине без одговорност за злоупотребите.
На Даравелски не му е застарено извршувањето на казната. Доколку немаше барање за ново судење бидејќи претходно беше суден во отсуство, тој ќе требаше да ја издржи казната.
