Владимир Путин нема да испрати новогодишни честитки до американскиот и францускиот претседател Џо Бајден и Емануел Макрон, ниту до германскиот канцелар Олаф Шолц, соопшти денеска Кремљ во екот на кризата меѓу Москва и Западот поради руската агресија врз Украина.
„Тие колеги не ни испраќаат никакви желби, ние всушност немаме никаков контакт со нив. Имајќи ги предвид нивните постојани непријателски дејствија, претседателот нема да им испрати новогодишни желби“, изјави за новинарите Дмитриј Песков, портпарол на руското претседателство.
Од друга страна, Путин веќе им ја честиташе Новата 2023 година на претставниците на земјите поблиски до Кремљ.
Според списокот што денеска го објави руското претседателство, Владимир Путин им честитал на претседателите на Кина Си Џинпинг, на Турција Реџеп Таип Ердоган, на сирискиот Башар ал Асад, на венецуелскиот Николас Мадуро и на индискиот премиер Нарендра Моди.
Тој за Кремљ вели дека им испратил добри желби и на поранешните лидери: Италијанецот Силвио Берлускони и Германецот Герхард Шредер.
