Најмалку 32 лица загинаа во ледената бура што зафати девет американски држави во последните денови, според новиот официјален биланс на жртви. Многумина загинаа во сообраќајни несреќи поради мразот и слабата видливост.
Поради невремето, десетици илјади американци го прославија Божиќ во темница поради прекини на струја. Повеќе од 150.000 луѓе останаа без струја, а некои железнички линии беа откажани во текот на викендот.
Најмалку 13 лица загинаа само во државата Њујорк, каде снежните наноси на некои места беа високи и до три метри.
Ледена бура има и во соседна Канада.
Синоптичарите соопштија дека само во петокот во Бафало паднале 71 сантиметар снег, а минатиот месец низ градот биле измерени рекордни 1,8 метри снег, кој паднал и за време на претходната зимска бура.
Сегашната бура е речиси без преседан во својот опсег: од Големите езера на канадската граница, до Рио Гранде долж јужната граница на САД со Мексико. Околу 60 отсто од населението на САД се соочува со тешкотии, а температурата е драстично под нормалата, објави Националната метеоролошка служба.
Метеоролозите објавија дека во близина на Големите езера се развил „циклон бомба“: кога атмосферскиот притисок многу брзо паѓа за време на силна бура, предизвикувајќи виулици и силни ветрови.
Жителите на западен Њујорк често гледаат драматични виулици поради „езерскиот ефект“ – кога студениот воздух кој ја собира влагата од топлата вода се движи над земјата каде што паѓа обилен снег. Но, дури и жителите на областа велат дека невремето сега е исклучително опасно.
