„TSMC“ е во напредни разговори со клучните добавувачи за да ја основа својата прва потенцијална европска фабрика во германскиот град Дрезден, потег што ќе му овозможи на најголемиот производител на чипови да капитализира од зголемената побарувачка од автомобилската индустрија во регионот.
Тајванската компанија испраќа тим од високи менаџери во Германија на почетокот на следната година за да разговара за нивото на владина поддршка за фабриката, како и за капацитетот на локалниот синџир на снабдување да ги задоволи потребите на локацијата, велат извори запознаени со ова прашање.
Тоа ќе биде второ вакво патување за шест месеци од страна на директорите на „TSMC“, а конечната одлука дали да се инвестираат милијарди долари во фабрика што би можела да започне со изградба веќе во 2024-та година се очекува да биде објавена наскоро, додаваат изворите.
Минатата година, рекоа тие, „TSMC“ добила барања од клиенти да размислат за изградба на фабрика во Европа, но по инвазијата на Украина, компанијата го прекина првичното истражување за ова прашање. Сепак, зголемената побарувачка од европските производители на автомобили за локално произведени чипови ја натера „TSMC“ повторно да ја разгледа идејата.
Одлуката за фабриката ќе и даде силен поттик на Европската унија (ЕУ), која се бори да ја намали својата зависност од увозот на полупроводници, клучни компоненти за сè, од паметни телефони до автомобили, од Азија. Претходно оваа година, Брисел одобри 43 милијарди долари субвенции во обид да ги привлече производителите на чипови во Европа.
Разговорите на „TSMC“ со неколку добавувачи на материјали и опрема се фокусирани на тоа дали тие можат да ги направат потребните инвестиции за поддршка на фабриката, велат извори запознаени со ова прашање.
Производството на полупроводници е сложен процес кој зависи од над 50 типови опрема и над 2.000 материјали, вклучувајќи хемикалии и индустриски гасови.
„Ќе се обидеме да ги поддржиме нашите клиенти. Нема да ги оставиме сами да шетаат во пустина“, рече еден директор на добавувачот што ќе обезбеди клучни материјали за фабриката во Дрезден, додавајќи дека ќе биде потребна владина поддршка.
Зголемените трошоци за енергија и забрзувањето на инфлацијата го принудија американскиот производител на чипови „Intel„ да побара поголема поддршка од германската влада за планот за изградба на фабрика вредна 16 милијарди долари во источниот град Магдебург.
„Intel“ сè уште има намера да инвестира во Европа, но фабриката во Магдебург мора да биде конкурентна, велат изворите.
Ако „TSMC“ навистина се пресели во погонот во Дрезден, ќе се фокусира на технологијата на чипови од 22 и 28 нанометри, слични на оние што планира да ги направи во фабриката што ја формира со „Sony“ во Јапонија.
„TSMC“ ќе мора да размисли дали изградбата на фабрика во Дрезден ќе ја оптоварува нејзината работна сила премногу. Производителот на чипови веќе испрати неколку стотици инженери да ги поддржат новите фабрики што ги гради во САД и вели дека ќе му требаат уште 500 до 600 за да помогнат во фабриката во Јапонија.
Европа, Блискиот Исток и Африка сочинуваат околу 6 отсто од приходите од продажба на „TSMC“, што е исклучително мал во споредба со 65 отсто што групата ги генерира од Северна Америка.
Портпаролот на „TSMC“ рече дека „не исклучува никакви можности“ за потенцијална фабрика во Дрезден.
Експанзијата на компанијата во странство доаѓа во време кога глобалните производители на чипови како „Intel“ и „Samsung“ се тркаат за проширување на капацитетот. Трите најголеми производители на чипови ветија дека ќе инвестираат најмалку 380 милијарди долари во следната деценија за изградба на нови фабрики во Тајван, Јужна Кореја, САД, Јапонија, Германија, Ирска и Израел.
Американскиот закон за чипови, кој беше предложен во 2020-та година и усвоен од Конгресот минатата година, доведе до приватни инвестиции од 200 милијарди долари во капацитетот за производство на чипови во земјата, соопшти Здружението на индустријата за полупроводници.
Темпото на глобална експанзија покрена прашања за ризикот дека индустријата може да се соочи со презаситеност на чипови доколку глобалниот економски раст нагло забави. Но, со оглед на прогнозата за глобалниот пазар на полупроводници, кој ќе достигне вредност од 1 трилион долари до 2030-та година, производителите мора да одлучат како да ја задоволат очекуваната побарувачка, имајќи предвид дека се потребни години за изградба на фабрики.
