Потпретседателот на Европската централна банка (ЕЦБ) Луис де Гуиндос верува дека сегашното темпо на зголемување на каматните стапки на ЕЦБ може да потрае некое време за да се спречи инфлацијата.
„Немаме друг избор освен да дејствуваме. Зголемувањето од 50 базични поени би можело да стане нова норма во блиска иднина“, рече Де Гуиндос во интервју за весникот Монд објавено денеска.
Ако ЕЦБ не преземе ништо, вели тој, ситуацијата би била уште полоша бидејќи инфлацијата е еден од факторите зад актуелната рецесија.
Според него, досегашните чекори на ЕЦБ ќе влијаат на инфлацијата. „Но, треба да направиме уште повеќе“, додаде Де Гуиндос, пренесува Ројтерс.
ЕЦБ го забави темпото на зголемување на каматните стапки минатата недела, но сигнализираше дополнително значително заострување на условите за задолжување бидејќи ги претстави плановите за испумпување на готовина од финансискиот систем како дел од решителната борба против инфлацијата.
Де Гуиндос, исто така, рече дека е загрижен дека пазарите би можеле да го потценат опстојувањето на инфлацијата и дека фискалната политика може да се смета за некомпатибилна со монетарната политика.
Банките имаат солидна капитална позиција и можат да издржат шок, рече тој и додаде дека се сомнева во издржливоста на небанкарските финансиски институции, особено хеџ фондовите кои имаат многу неликвидна актива и акумулираат ризични средства.
