Потрошувачката на примарна енергија на Европската унија се зголеми за речиси 6% во 2021-ва година, покажуваат податоците на Евростат.
Сè уште е под нивоата од претпандемиската 2019-та година, но со ова темпо земјите од заедницата се далеку од целите за намалување на потрошувачката на енергија до 2030-та година, според Евростат. Не е јасно дали овој тренд ќе продолжи во време на енергетската криза и рекордните цени на енергијата во 2022-ра година.
Минатата година, потрошувачката на примарна енергија, односно вклучувајќи ги загубите од енергетската трансформација, достигна 1,3 милијарди тони еквивалент на нафта, во споредба со 1,36 милијарди тони во 2019-та година. Во 2020-та година, ЕУ беше најблиску до целната 2030-та година, покажуваат и статистиките.
Финалната потрошувачка на енергија, односно потрошувачката на енергија од страна на крајните корисници – домаќинства, индустрија и земјоделство, достигна 968 милиони тони еквивалент на нафта и бележи пораст од 6,8% во однос на 2020-та година.
Намалувањето и на потрошувачката на примарната и финалната енергија во 2020-та година е резултат на пандемијата на коронавирусот, а веќе во наредната година падот се забавува. Затоа, Евростат прави порелевантна споредба – со просечните нивоа во периодот 2017-2019 година или со обид да се расчисти ефектот од коронавирусот. Сепак, мора да напоменеме дека во 2021-ва година имаше одредени ограничувања поврзани со Ковид-19.
Наспроти ова, статистиката покажува и дека минатогодишната потрошувачка на примарна енергија во споредба со просечните нивоа во 2017-2019 година е највидливо намалена во Естонија (-16,8%) и Португалија (-13,3%) и се зголеми во Литванија (5,7%) и Полска. (2,7%). Во однос на потрошувачката на финална енергија, најголемо намалување забележаа Малта (-10%) и Кипар (-9,7%). Истовремено, раст има и во Романија (7,5%) и Бугарија (3,9%).
