Посебен оперативен тим ќе се грижи за сајбер безбедноста во Македонија – Работна група од експерти треба да ги детектира слабите точки во критичната инфраструктура во земјава која лесно може да биде мета на сајбер напади. Оваа информација со јавноста ја сподели премиерот Димитар Ковачевски, откако веќе два месеци училиштата, дел од државните органи, трговски центри но и други објекти се мета на лажни дојави за бомби.
„Оперативниот тим ќе го раководи Бирото за јавна безбедност. Ќе има претставници на АНБ, Агенцијата за разузнавање и Секторот за воена безбедност при Министерството за одбрана. Ќе членуваат експерти доминантно од ИТ технологиите, се она што се зборуваше во јавноста – ВПН мрежи, делот на целиот процес врз кој овие хибридни закани кои се спроведуваат. Ќе имаат помош и од ад-хок експерти кои доаѓаат од други институции со соодветно знаење, а кои не можат да бидат членови поради сензитивноста на работата. Преку стручни мислења, ад-хок експертите ќе помагаат. Ќе биде во координација со стратешките партнери, САД и НАТО“, рече Ковачевски.
А според министерката за одбрана Славјанка Петровска, војската нема што да прави со дојавите за бомби, бидејќи тоа е работа на полицијата. Мејловите кои пристигнуваат најчесто во училиштата, според неа, не се реални закани.
„Информациите се темелат од безбедносните-разознавачки служби. Тоа е дека во моментов нема реална закана која може да влијае на нашата безбедност. Ако се појави било каков зголемен ризик за безбедност, граѓаните ќе бидат известени, а службите ќе постапат. Бомбите претставуваат закана, реална закана нема“, вели Петровска.
Ковачевски пак, вели дека тимот кој го најави ќе треба да изработи и дијагностика на системите кои ги имаме како критична инфраструктура во државата, во делот на сајбер безбедноста и хибридните закани и очекува за брзо време да има резултати.
Оваа информација пак, доаѓа откако претходно САД и Германија испратија предупредувања до нивните граѓани кои ќе патуваат во Македонија да внимаваат, а токму поради зачестените дојави за бомби кои во огромен дел остануваат нерешени.
А.Т
