Комитетот на американскиот Конгрес препорача да се покренат четири кривични пријави против поранешниот претседател Доналд Трамп, потврди пратеникот Џејми Раскин.
Комитетот смета дека треба да се покренат обвиненија против Трамп за попречување на официјалната процедура, заговор за измама на САД, заговор за давање лажна изјава и бунт, пренесува Би-би-си.
Ова не повлекува формална кривична пријава, бидејќи тоа треба да го одлучи Министерството за правда кога има работа со поединци. Станува збор само за препораки, посочува Би-би-си.
„Немаме правосуден систем каде пешаците одат во затвор, а водачите ќе се извлечат“, рече Раскин, демократ од Мериленд.
Конгресен комитет ги истражуваше минатогодишните немири во Капитол и улогата на Трамп во тоа.
Немирите започнаа на 6 јануари 2021 година, веднаш откако Трамп лажно тврдеше дека неговиот противкандидат на претседателските избори, Џозеф Бајден, ги украл изборите во 2020 година.
Комитетот, кој се состои од седум демократи и двајца републиканци, беше широко критикуван од републиканците како едностран.
