Инфлацијата во Европската унија и во еврозоната во ноември забави на годишна основа, но и понатаму е двоцифрена, па во ЕУ изнесуваше 11,1 отсто и во еврозоната 10,1 отсто, покажуваат податоците на Евростат објавени во петокот.
Годишната стапка на инфлација во ЕУ, мерена со хармонизираниот индекс на потрошувачки цени (HICP), во ноември изнесуваше 11,1 отсто, забавувајќи го растот откако во октомври достигна 11,5 отсто, покажа извештајот на Евростат. Во ноември минатата година, за споредба, изнесуваше 5,2 отсто.
Во еврозоната годишната стапка на инфлација се намали на 10,1 отсто во ноември, од 10,6 отсто во октомври. Во ноември минатата година, пак, годишната стапка на инфлација во еврозоната изнесуваше 4,9 отсто.
Забавувањето на инфлацијата во ноември во зоната на примена на заедничката валута го одразува забавувањето на растот на цените на енергенсите, кои во ноември беа повисоки за 34,9 отсто во однос на истиот месец лани. Имено, во октомври тие се зголемени за 41,5 отсто на годишно ниво.
Цените на храната, пијалаците и тутунот се повисоки за 13,6 отсто во однос на ланскиот ноември, откако во октомври пораснале за 13,1 отсто.
На месечна основа, потрошувачките цени во ноември се повисоки за 0,1 отсто на ниво на Унијата, додека за ист процент се намалени во еврозоната, покажуваат табелите на Евростат.
Годишен пад на стапката во 16 земји
Во однос на октомври, годишната стапка на инфлација е намалена во 16 земји, а зголемена е во осум земји. Во три земји се задржа на октомвриското ниво.
Две третини од земјите на ЕУ бележат двоцифрена годишна стапка на инфлација, покажуваат табелите на Евростат.
Унгарија имаше највисока годишна стапка на инфлација во ноември, од 23,1 отсто. Блиску е и Летонија, со инфлација од 21,7 отсто, и нејзините балтички соседи Естонија и Литванија, каде таа изнесуваше 21,4 отсто.
Во Хрватска, годишната стапка на инфлација во ноември изнесуваше 13 отсто и беше за 0,3 процентни поени повисока од претходниот месец. Во ноември минатата година таа изнесуваше 4,7 отсто, покажуваат табелите на Еуростат.
Италија, третата по големина економија, стапката на инфлација во ноември остана иста како и во октомври, на 12,6 отсто.
Во Германија изнесува 11,3 отсто и е за 0,3 процентни поени пониска од претходниот месец.
Шпанија во ноември забележа најслаб раст на потрошувачките цени од 6,7 отсто, Франција 7,1 отсто и Малта 7,2 отсто.
