Холандската влада ќе воведе ограничување за изнајмување на повеќе од 300.000 домови за да ги направи имотите попристапни за станарите со средни приходи во услови на огромен недостиг, пренесува „Bloomberg“.
Според планот, цената на киријата на овие домови ќе се намали во просек за 190 евра месечно кога новата мерка ќе стапи на сила од јануари 2024-та година.
Министерот за домување и просторно планирање Хуго де Јонг сака да ја прошири контролата на киријата што моментално постои за социјалните станови, така што таа ќе се применува на сите домови оценети до 187 поени на холандскиот систем за проценка на станови. Цената ќе се индексира секоја година со инфлација и кога законот ќе стапи на сила од јануари 2024-та година, овие имоти ќе имаат максимална месечна кирија од околу 1.100 евра.
Оние со среден приход, како што се наставниците, медицинските сестри и полицајците, се борат да ги задоволат зголемените кирии поради „огромниот недостиг“ на станови, рече министерот. Системот на рејтинг ќе стане задолжителен, што значи дека станоиздавачите кои нема да ги почитуваат максималните закупнини што се поставени, може да се соочат со парични казни.
Корпорациите и институционалните инвеститори сакаат да изградат 100.000 домови за луѓе со средни приходи до 2030-та година, објави владата во коминикето. Како што се зголемуваат регулативите, станарите ќе добијат поголема заштита, а сопствениците ќе сакаат да инвестираат повеќе во секторот, се додава во соопштението.
Не сите се согласуваат со оваа логика. Питер Боелхувер, предавач по системи за домување на „TU Delft University“, предупредува дека градежната активност може да се намали и сопствениците да бидат во искушение да продаваат имоти.
„Мерките, во комбинација со зголемувањето на хипотекарните стапки, може да го влошат недостигот на станови во земјата“, истакна Боелхувер.
„Ако ги погледнете нашите градежни дозволи во последните пет квартали, тие веќе се намалени. Инвеститорите и институциите градат помалку домови, а високите каматни стапки ја отежнуваат изградбата. Во таква ситуација може да биде загрозено целото производство на станови“, додава Боелхувер.
Холандија сега е европска земја со најголем број социјални имоти за изнајмување, според истражувањето на Организацијата за економска соработка и развој (ОЕЦД). Владата очекува дека до 2024-та година, над 90% од социјални и средни станови во Холандија на крајот ќе бидат дадени за помалку од 1.000 евра кога ќе се потпише нов закуп.
