Комисијата за заразни болести: Состојбата со короната и со синцицијалниот респираторен вирус е стабилна во земјата

Комисијата за заразни болести на денешниот состанок ја разгледа актуелната епидемиолошка состојба во државата и констатира дека состојбата со Ковид-19 е стабилна, нема зголемување на бројот на позитивни случаи, хоспитализирани и починати.

Ставот на Комисијата е дека четирите мерки, кои се актуелни и сѐ уште се во сила, како што се: носење маска во здравствени установи, аптеки, јавен превоз и домови за стари лица и лица со посебни потреби, одговараат на актуелната епидемиолошка состојба и тие ќе продолжат и во иднина.

Во однос на инфекцијата со РСВ – респираторен синцицијален вирус, констатирано е дека состојбата е стабилна, нема зголемување на бројот на новозаболени и хоспитализации, а болничките капацитети ги задоволуваат потребите за укажување здравствена грижа за децата со симптоми.

Комисијата наведува дека и понатаму ја следи состојбата со заразните заболувања во нашата држава и доколку има потреба од нови препораки, за тоа навремено ќе информира.