Американската министерка за финансии Џенет Јелен во неделата прогнозираше значително забавување на инфлацијата во САД во 2023-та година, но не исклучи неочекуван шок.
„Верувам дека до крајот на следната година ќе забележите многу пониска инфлација ако нема… неочекуван шок“, рече таа во интервју за „CBS“ што се емитуваше во неделата.
Запрашана за можноста од рецесија, поранешната претседателка на Федералните резерви рече: „Постои ризик од рецесија. Но… тоа секако не е, според мене, нешто што нужно ќе ја намали инфлацијата“.
Јелен ги даде своите коментари неколку дена пред состанокот на ФЕД, каде што се очекува централната банка да го забави агресивното темпо на монетарно затегнување што го спроведува оваа година.
Претседателот на ФЕД, Џером Пауел, сигнализираше помал пораст, од половина процентен поен, на основната стапка до опсег од 4,25%-4,5% по четири зголемувања од по 75 базични поени.
Јелен изјави за „CBS“ дека економскиот раст значително забавува, инфлацијата се намалува и се надева дека пазарот на трудот ќе остане силен.
Таа, исто така, изрази надеж дека овогодинешниот врв на инфлацијата ќе биде краткотраен и рече дека американската влада „научила многу лекции“ за потребата да се ограничи инфлацијата по високите цени од 1970-тите.
Трошоците за испорака паднаа, а долгите заостанати набавки се намалија, а цените на бензините се „намалени“.
„Мислам дека следната година ќе видиме значително забавување на инфлацијата“, рече таа.
