Денеска Европската комисија предложи деветти пакет санкции против Русија во кој ќе бидат опфатени уште 200 лица, компании, три банки, четири телевизиски станици, неколку компании од воено-индустрискиот комплекс, руската енергетска и рударска индустрија (целосна забрана за инвестиции во рударството) и ограничувања за набавка на беспилотни летала, пренесува британски „Ројтерс“. Ова го потврди претседателката на Европската комисија, Урсула фон дер Лајен.
Новиот, деветти пакет санкции ќе треба да го одобри Советот на Европската унија на состанокот што ќе се одржи следната недела. На „црната листа“ треба да се најдат високи офицери на руската армија, пратеници, гувернери, министри, политички партии и компании. Имињата на компаниите ќе бидат познати кога Советот на Европската унија ќе донесе нов пакет санкции.
Целта на новиот пакет санкции би можела да биде „Серуската банка за регионален развој“. Предлогот на Урсула фон дер Лајен е да се воведат ограничувања за извозот на стоки со двојна употреба. Ова се однесува на бројни хемикалии, нервни агенси, електроника и компоненти.
„Ќе го прекинеме пристапот до Русија на сите видови беспилотни летала, а исто така се предлага да се забрани директна испорака на беспилотни летала во Русија и нивен извоз во трети земји, на пример во Иран. Треба да удриме и врз руската пропагандна машина со исклучување на уште четири руски канали од етерот во Европската унија и забрана за нивно емитување и на онлајн платформите“, рече претседателот на Европската комисија.
