19 март, 2024
ПочетнаЕКОНОМИЈАГрад Скопје: Утре ќе се објави јавниот повик за приватните превозници, „Слобода...

Град Скопје: Утре ќе се објави јавниот повик за приватните превозници, „Слобода превоз“ и „Макекспрес“ нема да може да конкурираат

Јавниот градски превоз го организираат органите на локалната самоуправа, а не приватни бизнисмени, политички партии или други интересни групи. Во случајот организацијата на јавниот градски превоз е обврска на Град Скопје и ЈСП „Скопје“, се истакнува во соопштението од Град Скопје.

Основна заложба на ова градско раководство, како што велат од таму, е оптимизација на непродуктивните трошоци и пренасочување на тие средства кон проекти од корист за граѓаните. Додаваат дека Град Скопје и ЈСП во последните шест месеци успеаја да оспособат 130 автобуси од флотата на ЈСП, со што бројката на градски автобуси се зголеми од 140 активни во овој период минатата година на 270.

На овој начин, како што посочуваат, граѓаните на градот Скопје добиваат подобра, поевтина, сигурна и стандардизирана услуга.

Што се однесува до јавниот повик, тој, според Град Скопје, ќе биде објавен утре, а се однесува на линиите од кој градот Скопје има потреба – тоа се линиите со бр. 20 и бр. 22. Единствена разлика, како што појаснуваат, е во тоа што ниту „Слобода превоз“ ниту „Макекспрес“ нема да може да конкурираат една година од денот на раскинување на договорот поради прекршување на одредбите од договорот од нивна страна.

Ги повикуваме сите приватни превозници да аплицираат на објавениот јавен повик, индивидуално или преку претставник на група приватни превозници.

Што се однесува на патетиката на ВМРО-ДПМНЕ, ги повикуваме да одговорат на следните прашања:

– Дали Христијан Мицкоски со неговиот директор на штаб, Орце Тодоровски, инаку притворен и првообвинет во случајот „Делчевски ниви“, договараа набавка на 150 автобуси од Унгарија?

– Дали Христијан Мицкоски и неговиот актуелен шеф на штаб, Ивица Томовски, преку негови фирми е единствен подобен за одржувањето и чистењето во општините, училиштата и претпријатијата во кои ВМРО-ДПМНЕ е власт?

– Дали Христијан Мицкоски со Ковачевски имал тајна средба во еден скопски локал?

– Дали е точно дека Христијан Мицкоски, Александар Николоски, заедно со Зоран Заев и Венко Филипче, пред два месеца имале заеднички ручек во ресторан во Малешевијата, каде што се зборувало за уставните измени?

– Дали е точно дека Христијан Мицкоски има истрага во ОЈО ГОКК за криминал со хидроцентрали, кој се држи во фиока?

– Дали е точно дека брат на член на обезбедувањето на Христијан Мицкоски, сопственик на фирмата „Моби саунд“, е единствен организатор на манифестации во општините во кои власт е ВМРО-ДПМНЕ?

– Дали е точно дека Игор Јанушев, другар на Христијан Мицкоски и актуелен пратеник, како директор на ЈСП склучил штетен, речиси криминален договор со фирмата „Маратон“ за рекламирање на автобусите на ЈСП, и дали е точно дека од овој бизнис се делат и провизии?, прашуваат од Град Скопје.

Што се однесува на вицепремиерот во Владата на СДСМ, Фатмир Битиќи, пред да зборува за некаква си неподготвеност на Градот, првин да одговори на следните прашања:

– До каде е автопатот кон Охрид?
– До каде е автопатот кон границата со Бугарија?
– До каде е клиничкиот центар?
– До каде се инвестициите од „Гугл“ и „Фејсбук“?
– До каде е инфлацијата?, се истакнува во соопштението од Град Скопје.

НАЈНОВИ ВЕСТИ

ХОРОСКОП