Медведев: Доколку испорача системи за противвоздушна одбрана на Украина, НАТО станува легитимна цел

Заменик-претседателот на Советот за национална безбедност на Русија, Дмитриј Медведев, денеска изјави дека доколку НАТО почне да ја снабдува Украина со противвоздушни системи Патриот, тие заедно со персоналот на НАТО веднаш ќе станат легитимна цел на руската армија.

„Ако, како што навести генералниот секретар на НАТО, Јенс Столтенберг, НАТО почне да ги снабдува фанатиците од Киев со системи за противвоздушна одбрана „Патриот“, тие, заедно со персоналот на НАТО, веднаш ќе станат легитимна цел на нашите вооружени сили. Се надевам дека атлантските импотенти го разбираат тоа“, напиша Медведев на социјалната мрежа Телеграм, пренесува РИА Новости.

Столтенберг, по првиот ден од состаноците на министрите за надворешни работи на земјите од Алијансата во Букурешт, рече дека организацијата разговара за можноста за снабдување на вооружените сили на Украина со системи за противвоздушна одбрана Патриот.

Во исто време, Пентагон соопшти дека САД не планираат да ги испратат своите системи за противвоздушна одбрана во Киев, пренесува РИА Новости.

Рускиот министер за надворешни работи Сергеј Лавров изјави дека западните земји кои го поддржуваат режимот во Киев „стануваат страни во конфликтот“.