Генералниот секретар на НАТО Јенс Столтенберг изјави дека дијалогот со Русија повеќе не функционира и дека на Украина мора да и се помогне со системите за противвоздушна одбрана.
Тој подвлече дека контактите со Русија на воено ниво се неопходни за да се намалат ризиците од инциденти, а во случај да се случат да не се дозволи да излезат од контрола. Според него, потребно е и воспоставување контакти и контрола на вооружувањето.
„Во име на НАТО, можам да кажам дека со години се обидуваме да изградиме конструктивни односи со Русија и да водиме конструктивен дијалог. Русија се огради од тој дијалог. Нема можности да го продолжиме значајниот дијалог кој се обидуваме да го градиме со години.
Институционалниот дијалог, кој се обидовме да го изградиме за да го зајакнеме Советот Русија-НАТО, не функционира во условите кои ги имаме денес“, рече Столтенберг говорејќи на форумот на министрите за надворешни работи на земјите од НАТО во Романија.
Столтенберг подвлече дека е важно украинската армија да може да ги користи одбранбените системи што ги добива, па затоа е важно да се испорачува се повеќе делови и муниција.
„Не се работи само за складирање оружје, туку за тоа да може да се користи за соборување руски ракети. Можеме да очекуваме дополнителни напади, бидејќи Путин доживува неуспех на бојното поле. Повлекувањето на руските сили е знак на слабост, тоа покажува дека губат, но одговараат со напади врз градови и цивилна инфраструктура“, рече Столтенберг.
Тој посочи дека Русија сака да ги зголеми страдањата и степенот на бруталност, што, според него, не е забележано од Втората светска војна.
Тој рече дека НАТО гледа дека Русија и снемува муниција, дека почнала да бара оружје и муниција и тоа го побара од Иран.
„Ниту една земја не треба да ја поддржува илегалната војна на Русија. Никој, па дури ни Иран, не треба да ги снабдува со проектили или нешто друго“, објасни Столтенберг.
Тој рече дека очекува министрите за надворешни работи на конференцијата да го повторат ставот дека НАТО е отворен за нови членки. Оваа отвореност, рече тој, ја докажа НАТО со прифаќањето на Северна Македонија и Црна Гора, како и неговата подготвеност да ги прифати Финска и Шведска.
Москва постојано нагласува дека Северноатлантската алијанса е насочена кон конфронтација. Како што претходно подвлече портпаролот на Кремљ, Дмитриј Песков, натамошното проширување на блокот нема да придонесе за поголема безбедност во Европа.
Министерството за надворешни работи соопшти дека Москва останува отворена за дијалог со НАТО на рамноправна основа, додека Западот треба да се откаже од милитаризацијата на континентот.
