Рускиот претседател Владимир Путин во четвртокот предупреди на сериозни последици за глобалниот енергетски пазар доколку Западот воведе ограничување на цената на руската нафта.
Во соопштението од Кремљ се наведува дека Путин имал телефонски разговор со ирачкиот премиер Мухамед Шија ал Судани и му честитал за преземањето на функцијата.
Иако фокусот на разговорот беше на перспективите за проширување на билатералните трговски и економски врски, двете страни „ја пофалија заедничката работа на Русија и Ирак во рамките на организацијата ОПЕК+, што овозможува да се обезбеди стабилност на светскиот пазар на нафта.
Тие разговараа и за обидите на Западот да ја ограничи цената на руската нафта, се наведува во соопштението, додавајќи дека Путин нагласил дека „таквите активности се спротивни на пазарните принципи и многу веројатно ќе резултираат со сериозни последици за глобалниот енергетски пазар“.
Европската унија досега не успеа да постигне договор за ограничување на цената на руската нафта, а Урсула фон дер Лајен, претседателката на Европската комисија, во четвртокот рече дека членките работат „со полна пареа“ на деветтиот пакет санкции против Русија и многу брзо ќе одобри глобално ограничување на цената на руската нафта со Г7 и другите големи партнери.
„Нема да мируваме додека Украина не го победи Путин и неговата незаконска и варварска војна“, рече фон дер Лајен.
