Војната во Украина е „единствениот најзначаен негативен фактор“ за светската економија оваа година и најверојатно во 2023-та година, изјави директорката на Меѓународниот монетарен фонд (ММФ) Кристалина Георгиева за „CNBC“ на маргините на состанокот на Г-20 во Индонезија.
„Сè што создава поголема вознемиреност е секако штетно за изгледите за раст и за постигнување на потребите и аспирациите на луѓето насекаде“, рече таа.
Нејзината изјава беше одговор на инцидентот со ракета што падна на полска територија доцна во вторникот, при што загинаа двајца цивили.
Првичните проценки сугерираат дека ракетата од руско производство можеби била истрелана од украинските сили кон руска ракета.
Повеќето членки на Г-20 ја осудија руската агресија врз Украина во нацрт-декларација во вторникот.
„Сакам да и честитам на Индонезија за доброто претседавање во овој многу тежок момент“, рече Георгиева.
Таа сепак нагласи дека најважната задача на самитот на Г-20 не била општата декларација, туку фокусот бил на „многу итни прашања“ како што се светската инфлација, зголемените трошоци за живот, безбедноста на храната и енергијата.
„Ги слушав многу внимателно сите говори и охрабрува што тоа се прашањата на кои сме фокусирани, како што треба“, рече Георгиева.
ММФ претходно предупреди на фрагментација на глобалната економија како резултат на војната меѓу Русија и Украина и ја намали прогнозата за раст за 2023-та година на 2,7%, очекувајќи забавување од проектираните 3,2% во 2022-ра година.
„Ова се најслабите изгледи за раст од 2001-ва година, со исклучок на глобалната финансиска криза и акутната фаза на пандемијата со Ковид-19“, забележа Фондот во својот октомвриски извештај.
„Веќе гледаме некои знаци на фрагментација и тие доаѓаат од легитимна грижа…, безбедноста на снабдувањето“, рече Георгиева.
„Го гледаме ова поради Ковид-19 и војната во Украина, синџирите на снабдување се нарушени и тоа му штети на растот на локално и на меѓународно ниво“, додаде таа.
Според неа, ако светот избере да премине во „одвоени блокови“, ќе се плати висока цена.
„И оваа цена ќе биде особено висока за отворените економии и пошироко за светот во развој“, посочи Георгиева.
Азија и Пацификот би можеле да изгубат повеќе од 3% од својот бруто домашен производ ако трговијата се подели на сектори погодени од американските санкции за кинеските чипови и нетарифните бариери се подигнат на „нивоа на Студената војна“, забележа ММФ во својот минатогодишен извештај.
„Ако не сакаме да изгубиме помеѓу 1,4 трилиони долари до можеби 3,4 трилиони долари годишно, само замислете што можеме да направиме со тие пари, тогаш треба да бидеме многу јасни за последиците од нашите постапки и да покажеме мудрост за да спречиме незабележливо преминување во свет кој е посиромашен и помалку безбеден“, рече Георгиева.
