Меѓународните финансиски институции ќе ги поддржат „коридорите на безбедност“ и на тој начин ќе ја гарантираат глобалната безбедност на храната и ќе ја поддржат економијата на Украина.
Иницијативата е на Европската комисија, која објави дека за таа цел мобилизирала 1 милијарда евра.
Шемата за поддршка ќе ги вклучи Групацијата на Светска банка, Европската банка за обнова и развој (ЕБОР) и Европската инвестициска банка.
Секој од нив ќе инвестира по 300 милиони евра во иницијативата. Од своја страна, ЕК ќе обезбеди бесплатен заем од 250 милиони евра, кој ќе биде насочен кон подобрување на царинската контрола. За подобрување на инфраструктурата се предвидени уште 50 милиони евра.
Пакетот мерки „Solidarity Lanes“ беше инициран во мај од Европската комисија и граничните земји на ЕУ. Вклучува голем број олеснувања – транспорт, царина, складирање итн., за сообраќај на прехранбени производи и друга стока од и кон Украина.
Инвестицијата на ЕБОР, како дел од оваа мобилизација, ги одразува заедничките приоритети на банката и Комисијата за поддршка на економијата на Украина и пристапот до храна за земјите кои се потпираат на нејзиниот извоз, коментираат од институцијата.
Украина е еден од најголемите производители на жито во светот и во нормални времиња испорачува околу 45 милиони тони жито на светскиот пазар секоја година. Како резултат на војната, извозот и земјоделскиот сектор на Украина беа сериозно погодени, што доведе до високи цени на житото и глобална несигурност во храната.
Како дел од својата заложба, ЕБОР дава приоритет на инвестициите во патната, железничката и друга инфраструктура. Ова вклучува инвестиции и поддршка за проекти во Украина, Молдавија, Полска и Романија.
Банката веќе ја поддржа Молдавија со 100 милиони евра за подобрување на транспортната мрежа до границата со Украина. Заедно со ЕК, се подготвува финансиско портфолио за модернизација на нејзината железничка мрежа, која е од суштинско значење за сообраќајот на стоки од Одеса до речните пристаништа на Молдавија, Романија и Украина.
Во Полска, постои значителна потреба од координирана надградба на железничкиот капацитет за претовар на границата со Украина и за проширување на пристаништата на Балтичкото Море. За таа цел, банката го поддржа проширувањето на пристаништето Гдањск.
