Иако некои љубители на велосипедизмот сè уште тврдат дека електричните велосипеди никогаш нема да можат да го пружат задоволството како чистото возење со педали, бројот на возачи на е-велосипед постојано се зголемува. Ваквиот начин на транспорт се покажа како исклучително корисен и ефикасен бидејќи е-велосипедистите не користат автомобили, а физичката активност се уште е присутна, само со помал замор и, што е многу важно при одење на работа, на пример, помалку потење.
Покрај тоа, на многу луѓе овој начин на возење е повозбудлив и повеќе уживаат во него. Ова го покажаа резултатите од студијата објавена во Journal of Transport & Health. Треба да се нагласи дека ова истражување е спроведено на многу мал примерок од само 15 луѓе, но неговите резултати се секако значајни.
Учесниците во истражувањето возеле велосипед во два наврати по еден час, а во текот на возењето биле следени нивните отчукувања на срцето. По возењето, велосипедистите морале да пополнат прашалник за задоволството во текот на возењето, тежината на возењето и заморот, а научниците овие податоци ги поврзале со пулсот.
Резултатите што ги добија не се изненадувачки. Имено, оние кои само ги вртеле педалите, без поддршка на електромотор, повеќе се изморувале, а возачите на електрични велосипеди трошеле 13 отсто помалку енергија додека возеле. Што се однесува до уживањето во возењето, многу позадоволни беа возачите на електрични велосипеди. Имено, без разлика колку е забавно и големо задоволство возењето класичен велосипед, повеќето луѓе кои имале можност да возат електрични велосипеди многу добро знаат колку е забавно да се сврти рачката и наеднаш да се забрза е-велосипедот додека се вози.
Иако критичарите на електричните велосипеди веруваат дека физичката активност на нивните возачи е многу помала бидејќи педалите се вртат поретко и побавно, некои студии го покажаа токму спротивното. Имено, бидејќи возењето е-велосипеди е полесно и возачите се помалку уморни, тие поминуваат повеќе време возејќи ги овие велосипеди, така што вкупното време на педалите е често подолго во споредба со класичните велосипедисти.
