Полската рафинерија за нафта ПКН Орлен побара од руската компанија Транснефт да испорача 3 милиони тони нафта, пишува Комерсант.
Нафтата треба да се испорачува преку нафтоводот Дружба во 2023 година, според сегашните долгорочни договори, пишува рускиот весник, повикувајќи се на свои извори.
„Транснефт“ потврди за „Комерсант“ дека добил барања од полски клиенти за следната година, но не прецизираше кој ги доставил и за колкаво количество нафта станува збор.
ЕУ ќе воведе ембарго на руската нафта на 5 декември, но забраната официјално се однесува само на пратки по морски пат. Полска и Германија добиваат руска нафта преку нафтоводот Дружба, но најавија дека ќе го прекинат увозот до крајот на годината, потсетува Индекс.
„ПКН Орлен континуирано го диверзифицираше своето снабдување со нафта. Во моментов, 70 отсто од нафтата за сите рафинерии во Полска, Чешка и Литванија доаѓа од насоки кои се алтернатива на Русија“, изјави за Ројтерс канцеларијата за односи со медиумите на ПКН Орлен како одговор на барањето за коментар.
„…компанијата моментално има само долгорочни договори за испораки во Полска од тој правец (Русија)“, истакнуваат во таа канцеларија и додаваат дека целосно го прекинале увозот на руска нафта по морски пат, пренесува порталот.
ПКН Орлен склучи договори за снабдување со нафта со Роснефт и Татнефт. Договорот со Роснефт треба да истече на крајот на годината, а со Татнефт до декември 2023 година, според трговците.
Според договорот, „Татнефт“ и испорачува на Полска околу 200.000 тони сурова нафта месечно. Двата договори беа потпишани пред февруари 2022 година.
„Ако не се воведат директни ограничувања, купувањето на нафта од Урал според старите услови на договорот следната година е многу профитабилно за ПКН Орлен: цените се засноваат на континуираните историски ниски трошоци на нафтата од Урал што се транспортира по море“, објаснува трговец на рускиот пазар на нафта.
