Шефот на руската дипломатија Сергеј Лавров и портпаролката на МНР Марија Захарова денеска демантираа дека бил хоспитализиран на Бали, по пристигнувањето на самитот на Г20.
„Јас и Сергеј Викторович ги читаме вестите и не им веруваме на нашите очи: излегува дека е хоспитализиран“, напиша Захарова на нејзиниот канал на Телеграм.
„Ова е, се разбира, врвот на фејковите. Па, почекајте ја големата ексклузива“, додаде Захарова.
Таа на Телеграм објави видео на кое Лавров седи на терасата, во шорцеви и маица, со хартии на масата.
На прашањето на Захарова како ја коментира веста за хоспитализацијата, Лавров одговори: „Десет години пишуваат за нашиот претседател дека е хоспитализиран, болен. Тоа е игра која не е нова во политиката“.
Лавров ги советуваше западните новинари кои објавија дека е хоспитализиран „да ја напишат вистината и да не се ограничуваат само на една гледна точка“.
Тој најави и учество на утрешниот самит.
Во исто време гувернерот на Бали изјави дека Лавров е во добра здравствена состојба, но дека е во болница на преглед.
Бројни светски медиуми рано утринава објавија дека Лавров наводно бил хоспитализиран на Бали, каде што пристигнал претходната вечер за да присуствува на самитот на Г20.
Повикувајќи се на индонезиски официјални лица, медиумите објавија дека Лавров бил однесен во болница бидејќи неговото здравје се влошило по пристигнувањето на самитот на Групата 20 на Бали.
Тројца индонезиски владини и медицински претставници, кои не се именувани, изјавија дека Лавров се лекува поради срцев проблем.
