Концернот „Ferrari“ е полн со самодоверба за својот развој во наредната година и не се плаши од актуелните економски проблеми на европскиот континент, инфлацијата и енергетската криза.
Овие заклучоци стануваат јасни од презентираните резултати на италијанската компанија за третиот квартал од годината од страна на извршниот директор Бенедето Виња.
Тој додаде дека иако сегашните финансиски околности претставуваат „нови предизвици на глобално ниво“, за италијанскиот производител на автомобили и неговите добавувачи, огромниот заостаток на нарачки на автомобили е добро навестување за идната работа на компанијата.
Во изјава за „Reuters“, Виња додава дека нарачките за првиот „SUV“ на марката, „Purosangue“, ги надминале нивните најамбициозни очекувања. Во моментов целата гама на брендот, со исклучок на неколку модели, е распродадена. „Purosangue“ беше претставен во септември и ќе биде готов следната година. Опремен е со иконскиот V12 мотор со моќност од 725 ks и според Виња, автомобилот нашол „многу позитивен одговор“ кај клиентите на „Ferrari“.
„Ferrari“ во првите девет месеци од годинава имаше нето добивка од 718 милиони евра, што е раст од 16%, а приходи од 3,72 милијарди евра (+20%). За цела 2022-ра година, групацијата цели на обрт од околу 5 милијарди евра, наспроти 4,9 милијарди во минатата година.
За да се справи со зголемените трошоци за производство поради инфлацијата, „Ferrari“ прибегна кон „едноцифрени зголемувања на цените на одредени модели и одредени пазари“, објаснува Виња. Прометот се зголеми за 18,7% на 1,25 милијарди евра во третиот квартал, нето добивката се зголеми за 10% на 228 милиони евра.
Европа, Блискиот Исток и Африка останаа главните пазари на „Ferrari“ во третиот квартал со испорачани 1.291 автомобил, но бројот е намален за 1%. Испораките се зголемија за 28,2% во Америка и 73,1% во регионот Кина-Хонг Конг-Тајван. Во периодот јули-септември, производителот испорача вкупно 3.188 автомобили ширум светот, што е зголемување за 15,9%.
Наместо „удвојување на волуменот“, „Ferrari“ ја претпочита „ексклузивноста и уникатноста“ на своите модели, објасни шефот на марката. Така, уделот на „Purosangue“ во залихите не треба да надминува 20% од вкупниот број. Производителот предвидува промет до 6,7 милијарди евра до 2026 година, според стратешкиот план.
„Ferrari“ има намера да ја постигне оваа амбициозна цел со лансирање на 15 нови модели помеѓу 2023-та и 2026-та година. Позната по своите моќни и громогласни термални мотори, компанијата ја покажа својата желба да влезе во електричната ера. Така, 100% електрични и хибридни модели треба да сочинуваат 60% од производството до 2026-та година и 80% до 2030-та година, според стратешкиот план.
Приходите од продажба на автомобили и резервни делови се зголемени за 19,6% на 1,05 милијарди евра. Приходите генерирани од продажбата на мотори паднаа за 25,3% на 41 милион евра поради падот на испораките на „Maserati“, бидејќи договорот меѓу двете групи се приближува кон својот крај во 2023-та година.
